Урушбатчылыкъгъа къаршы

Дёгерек столну гиришив сёз булан районну башчысыны кёмекчиси Камил Мурзаев ачды ва юрютдю.

Дёгерек столда районну прокуроруну старший кёмекчиси Муртаза Гьажиев, районну ич ишлер бёлюгюню начальнигини орунбасары Руслан Халдузов, Къарабудагъгент юртну Жамият советини председатели Имамутдин Къаранаев, районну спорткомитетини ёлбашчысы Завур Умаракъаев, районну ИТ бёлюгюню ёлбашчысы Адилбий Къурбанов, Къарабудагъгент районну жагьиллерини парламентини председатели Абакар Къаранаев ва жагьиллени парламентини вакиллери ортакъчылыгъын болдурдулар.

Жыйылгъанлар яшавда гьар гюн ёлугъагъан кёп тюрлю агьвалатланы айланасында пикру алышдырдылар. Биз шолай гьаллагъа нечик тюшебиз, тувулунгъан гьалдан чыкъмакъ учун не этме тарыкъ, не йимик чаралар гёрме тюше, урушбатчылыкъны алдын алмакъ, урушбатчылыкъ болмасын учун не этме герек деген масъалаланы айланасында сёз юрюлдю.

Чараны форматы дёгерек столну айланасындагъылагъа урушбатгъа къаршы оьзлени ойларын, пикруларын айтма, соравлар берме болушлукъ эте эди.

Ёлугъувну ахырында чараны ортакъчылары бизин жамиятыбызда урушбатчылыкъ яман аврувну йимик, ону алдын алывда комплекс чара гёрме, сав этивню ёлунда иш гёрме тарыкъ. Ёлдашлар урушбатчылыкъ­ны алдын алывда, ватандашланы бары да къатлавларыны арасында англатыв ишлерден башлама, урушбат берген, урушбат алгъан адам нечик такъсырланма болагъанына тюшюндюрме герек.

Ёл юрюшню, тазалыкъны, оьзге законда гери урулагъан затланы этгенде салынагъан къодулардан баш къачырмакъ учун, къардашлыкъ аралыкълардан пайдаланып, урушбат берип къутулмакъны гьайын этме тарыкъ болмай. Шо да законсуз зат.

Урушбатчылыкъ булан ябушув юрютювде маълумат къуралланы вакиллери булан бирликде сатыв-алыв ва оьзге законланы бузагъан къурумлагъа рейдлер этме, бирче иш гёрме таклиф этдилер.