Игит болуп тувмай…
Белгили кюйде, Уллу Ватан дав битип, совет халкъ Уллу Уьстюнлюкге ес болгъанлы бу йылны май айында 75 йыл тамамланды. Шо давларда игитликлер гёрсетген давну ортакъчылары бугюнлерде бизин арабызда ёкъ. Тек олар болмаса да, давну ортакъчылары, къоччакъ уланларыбыз гёрсетген игитликлени биз бир заманда да унутмажакъбыз. Наслудан-наслугъа айтыла туруп, оланы гьакъында гележекде де яшларыбыз билер, оланы эсделигине гьюрмет этер деп инанабыз. Давдан сонггъу къыйынлы йылларда арагъа чыкъмай къалгъан кёп гючлю уланларыбыз, оланы къоччакълыкълары бугюнлерде де арагъа чыгъа, игитлерибизни санаву арта, белгисиз тас болгъан давну ортакъчылары гёмюлген ерлер мекенли бола. Ахтарыв, излевню натижасында давну ортакъчыларыны сиягьы оьсе.
Декабр айны 9-нда Къарабудагъгент Баш китапханада Ватанны Игитлерини гюнюне багъышланып, «Мы помним имена героев наших» деген чара оьтгерилди.
-Дав башланып биринчи гюнден тутуп, дагъыстанлылар ватанын якъламагъа гьазир экенин англатгъан, кёбюсю халкъ давгъа гёнгюллю кюйде гетмек учун кагъызлар язгъан.
Кёп санавда дав дивизиялар, полклар къурулгъан. Шоланы бириси-714-нчю зенит-артиллерия полкда 980 дагъыстанлы къыз болгъан. Шоланы арасында бизин юртлу къыз Мадина Ахунжанова да болгъан…-деп хабарлай къоччакъ къызны гьакъында Къарабудагъгент гимназияны охувчусу Ф. Къазакъмурзаева.
Сонг Уллу Ватан давну ортакъчысы, Макътавлукъну уьч де даражалы орденлерини кавалери, уллубийавуллу миномет расчетну командири Абдурагьман Ширавовну игитликлери ва дав ёллары гьакъда баш китапханачы А.Пашаева охувчулагъа маъналы хабарлады. Баш китапханачы Д.Ильясова къарабудагъгентли Гьизбулла Гьиравовну дав ёллары, къоччакълыкълары ва игитликлери гьакъда жыйылгъанлагъа айтды.
Къарабудагъгент юрт тарих- ахтарыв музейни директору Х.Алиева гьалиги заманны игити, демек, Россияны Игити Магьамматшамил Абдурагьимовну, Къарабудагъгент 3 номерли орта школаны муаллими С. Багьриева дёргелили дав врач Абусайит Исаевни гьакъында, давну ортакъчысы, Социалист Загьматны Игити, белгили ва бажарывлу ёлбашчы Илмутдин Насрутдиновну гьакъында Къарабудагъгент 3 номерли орта школаны 9-нчу класларыны охувчулары хабарлады.
Игитлеге макътав этмек, оланы къоччакълыкъларын эсге алмакъ, гележек наслугъа етишдирмек – бизин борчубуз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
