Меню
16+

Сетевое издание "Району яшаву"  «Будни района»

27.11.2020 09:11 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Белсенмесе болмажакъ...

Автор: Шихав Къайирбеков

Ноябр – календарда гюзню ахырынчы айы. Къыш аста-аста толу кюйде оьзюню ихтиярларына геле. Гечелер къырав салма, тав башларда акъ къар гёрюнме башлагъан. Юрт хозяйство производствода гьайванчылыкъ лап авур тармакъ гьисаплана. Гьайванлагъа артыкълыгъы булан болар чакъы къатты ва тири емлер топланмаса, гьайванчыларыбыз дагъыдан-дагъы авур гьалгъа тюшегени ачыкъ. Бу йыл бизин якъларда гьайван-малгъа мугькам ем база топлавда имканлыкълар болмады. Чакъ къургъакъ гелгенге гёре, табии биченликлерде онча от оьсмеди. Шо себепден чалынгъан ерлерден аз масса чыгъа эди. Гьайванлар айлана якъны авурлукъларын англамай. Олагъа отлукълар емден толуп болма тарыкъ.

Районда гьайван-малны къышлаву нечик бара, ерлерде гьайванлагъа таман даражада емлер топлангъанмы?

Гьайванланы къышлавуну барышына байлавлу болуп, мен районну юрт хозяйство управлениесини баш зоотехниги Мурза Алиев булан ёлукъдум.

Ол емлени гьакъында сёз чыкъгъанда, булай деди:

-Бизин районда буссагьатгъы вакътиде 25730 уллу мююзлю гьайванлар бар. Шоланы 9612-си – сыйырлар. Гиччи мююзлю гьайванларыбыз 65 127 бар. Шоланы 37362-си – ана маллар.

Районда бар гьайван-малны токъ къышлавун болдурмакъ учун бизге 15200 тон салам, 26500 тон бичен, 7200 тон сенаж тарыкъ. Оьрде де эсгерип гетгенибиз йимик, бу йыл бизин районда ем топлавну масъаласы итти токътагъан эди. Сугъарылагъан участкалагъа чачылгъан кёп йыллыкъ отлардан болса тюгюл, онча ем чыкъмай эди. Амма районну гьайванчылары авур шартлагъа да къарамайлы, емлени гьайын этдилер. Тыш якъдан гьайван-малгъа салам, бичен топламакъны гьайы этилди.

Буссагьатгъы вакътиде районда гьайван-малгъа деп топлангъан 12100 тон салам, 21700 тон бичен, 2100 тон сенаж бар. Буссагьатда да бир-бир гьайванчылыкъ юрт хозяйство предприятиелер райондан тыш янларда къатты емлени гьайын эте, ташып туралар,-деп баш зоотехник сезон тамамлады.

Санавлар гёрсетип турагъаны йимик, гетген йылдан эсе бу йыл районда гьайванлагъа топлангъан къатты емлени къадары аз. Шо саялы гьайванчылагъа бар емлени асувлу къоллап, гьайванлагъа югъунчлу этип беривню чараларын гёрюп ишлемесе болмажакъ. Бары гючню гьайван-малны къышлавдан тас этивлерсиз чыгъармакъны гьайын этип ишлеме тюшежек. “Къызгъанч эки керен утдурар” деген айтывну ери гелген. Къатты емлени базардан сатып алып топларбыз дейгенлер гьали бек утдуралар. Буссагьатгъы вакътиде Манас базарда бир тай саламны багьасы –150, дюгю салам – 130-140, люцерна бичен 240-250 манатгъа чыкъгъан. “Ёкъну ери къатты бола” дегенлей, талапгъа гёре багьалар да гётериле.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5