Юртлуланы эсинде
Белгили кюйде, Россия Федерацияда ноябр айны 10-нда Ич ишлер къурумланы къуллукъчусуну гюню белгилене. Шо гюнге багъышланып, районда ич ишлер къуллугъунда ишлеп гетген ветеранланы, яхшы иш гёрсетгенлени атлары эсге алына, оланы атына макътавлу сёзлер языла.Олай да, шо гюн халкъны парахатлыгъын якълап, районлулар рагьатлыкъда яшасын деп, олар учун къоркъунч гелтиреген адамлагъа къаршы ябушувда жанын къурбан этген полицияны къуллукъчуларыны атлары уллу гьюрмет булан эсгериле. Шолайлар буса бизин районда кёп бар. Олар оьзлер бугюнлерде бизин арабызда болмаса да, олар гёрсетген къоччакълыкълар бизин эсибизде даимликге къалажакъ, гележек наслугъа уьлгю гьисапда оланы гьакъында кёп айтылажакъ.
Мен гьали шолай къоччакъ кюйде жан берген уланланы бириси, къарабудагъгентли Жамал Алиевни гьакъында айтмагъа сюемен.
Алиев Жамал Сайитагьматович 1985-нчи йылны сентябр айыны 17-нде Къарабудагъгент юртда тувгъан. Ол 2001-нчи йыл школаны 10-нчу класын битдирип, «экстерно» экзаменлер де берип, аттестат ала. Сонг ол Дагъыстан пачалыкъ педагогика университетни ихтияр якълав факультетине охума тюше. Охуп битип, дипломгъа ес болгъан Жамал Алиев, 2007-нчи йыл ватанны алдындагъы борчун кютмек учун асгерге чакъырыла. Асгер борчун кютюп къайтгъан жагьил улан 2008-нчи йылны яйында Къарабудагъгент район милиция бёлюгюне ишге тюше. Бираз ишлеген сонг, Жамал ишинден таба Губден ПОМ-гъа бакъдырыла, Губденде ол гьакъылбалыкъ болмагъан яшланы ишлерине къарайгъан инспектор болуп ишин узата.
Оьр охув ожакъны да битдирип, оьзю кёп сююп сайлагъан ишине де тюшген Жамалны умутлары уллу болгъандыр… Тек къысмат биз сюйген кюйде болмай дагъы…
Стажёр Жамалны милицияны жаваплы ишине мекенли уьйретмек учун губденли сынавлу улан, Губден ПОМ-ну ёлбашчысы, милицияны майору Абдулмалик Магьамматовгъа тапшурула. 2008-нчи йылны узагъында Губден юртда оператив гьал оьтесиз авур оьте. Законсуз савутлангъан бандит бёлюклер гьар-бир яндан оьзлени чапгъынларын этип, яман ишлерин арагъа чыгъарып турагъан заманлар…
Бир нече керенлер бандитлер школагъа чапгъын этмеге айланагъаныны алды алынды. Олай да, бираз алда милицияны майору Абдулмалик Магьамматовну агьлюсюне къоркъутувлар берилип, уьюне от салынды… Шолай, сентябр айны 11-нде (2008-нчи йыл) Губден школагъа багъып бир машин ва эки мотоцикл булан маскалар гийген адамлар геле деген маълуматны эшитген сонг, майор Абдулмалик Магьамматов оьзюню ягъындагъы милицияны къуллукъчулары ва юртну активистлери де булан школаны айланагъа алып сакълай ва террактдан къутулта.
Октябр айны 21-нде бандитлени бир бёлюгю (20-гъа ювукъ адам) гючлю кюйде савутланып, оьзлени нас ишин узатма сююп, Губденге багъып тербене. Тек оьзлени онда къаравуллайгъанны билген бандитлер къачма токъташа. Оланы артындан тюшген милицияны къуллукъчуларыны арасында жагьил улан Жамал да бола. Иш башлагъаны кёп заман болмай буса да, Жамал къоркъмай, тартынмай, оьзюн къатты кюйде тутма, сынавлу милицияны къуллукъчуларындан къалышмайлы, къоччакълыкъ гёрсетме бажара.
Жанга юртну ягъындагъы агъачлыкъда бандитлер артындан етишип гелеген милицияны къуллукъчулары бар якъгъа багъып атылагъан алатланы ташлап атылтгъан, сонг оьзлер де атышмагъа башлагъан. Бандитлер милицияны ва ОМОН-2-ни къуллукъчуларына багъып гючлю атышывлар этген. Шо атышывларда оьзюгер авур яра тийген Жамал, жан берген ёлдашыны автоматын алып, жинаятчылагъа багъып атыша ва ёлдашларын оьлюмден къутгъара. Тек авур яралангъан Жамалны къутгъарма бажарылмай. Шо давда губденли А.Магьамматов да авур яраларындан жан бере. Жагьиллигине де къарамайлы, азиз жанын аямайлы, душмангъа къаршы бетге-бет туруп къоччакъ кюйде ябушгъан ва жан берген Жамал герти макътавгъа тийишли. Ону къоччакълыгъы – жагьиллеге уьлгю. Оьзю арабызда болмаса да, ону ярыкъ келпети юртлуланы эсинде даимликге къалажакъ.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
