Бары затгъа баш
Турналар да исси якълагъа гёче. Гечелер шайлы салкъын болагъан болгъан. Юртлу загьматчылар тезден авлакъ ниъматланы тюшюмлерин къайтарып, сакълавгъа салагъанларын сакълавгъа салып, салмайгъанын батдырып битгенлер. Тарихге гетип барагъан йыл сабанчылагъа аз гьитинме, гелеген йылны тюшюмю учун гюзлюк къылчыкълы ашлыкъланы чачып парахат болмакъ къалгъан.
Гьар талатгюнлер район администрацияны залында оьтгерилеген гезикли генгеш районда гюзлюк авлакъ ишлени барышына багъышлангъан эди.
Генгешде районну башчысы М.Амиралив, администрацияны бёлюклерини ёлбашчылары, юртланы башчылары, райцентрда иш гёреген къурумланы гьакимбашлары ортакъчылыгъын болдурдулар.
Районну башчысы М.Амиралиев залдагъылар булан саламлашып битген сонг, трибунагъа районда гюзлюк авлакъ ишлени барышы гьакъда баянлыкъ берме районну юрт хозяйство управлениесини ёлбашчысы Шагьабутдин Мустапаевни чакъырды. Ол оьзюню сёйлевюн булай башлады:
- Районну загьматчылары 2021-нчи йылны тюшюмю учун бу йыл гюзде 10900 гектаргъа гюзлюк къылчыкълы ашлыкълар чачма тарыкъбыз. Тек республиканы гьакимбашлары ерлерде юрт хозяйство агьамияты булангъы топуракъланы асувлу къоллавун болдурмакъ муратда районда гюзлюк ашлыкълар чачылагъан майданланы къадарын 11664 гектаргъа етишдирме тапшурув берген. Биз де ерли муниципалитетлени имканлыкъларын гьисапгъа алып, гьар юртгъа планлар салгъанбыз.
Айтма тарыкъ, 2021-нчи йылны тюшюмю учун гюз чачывгъа гьазирлик гёрюв, чачыв ишлер авур шартларда бара. Чакъ къургъакъ барагъаны, топуракъда дагьни ёкъгъа гёре участкаланы тегишлеп, чачыв даражасына етишдирме къыйын.
Шогъар да къарамайлы, районда гюз чачыв, топуракълар сюрюв узатыла. Сюрювге – 22, чачывгъа 28 техника къуршалгъан. Буссагьатгъы вакътиде районда ашлыкълар чачмакъ учун сюрюлген 11270 гектар топуракълар бар.
Ноябр айны 10-уна районда 6450 гектар топуракълагъа ашлыкълар чачылгъан. Планны толуву – 55%.
Оьзюню сёйлевюн узата туруп, Ш.Мустапаев гюзлюк авлакъ ишлени мукъаятлы оьтгерме гьазирлик гёрювде, гюзлюк ашлыкълар чачывда сипте гёрсетип ишлейген юрт муниципалитетлени башчыларын айрыча эсгерди. Олар: Гьели, Къарабудагъгент, Губден юрт муниципал къурулувлар. Чарада гюз чачывну планларын йырагъан муниципал къуллукъланы атына да танкъыт сёзлер айтылды. Ол оьзюню сёйлевюнде Къурбуки, Дёргели юрт муниципал къурулувланы танкъыт этди. Паравулда гюз чачывгъа тергев берилмейгенин аян этди.
Чарада гьасил чыгъарып сёйлей туруп, районну башчысы М.Амиралиев чачывну планларын йырагъан гьар муниципал къурулувну башчысыны атын тутуп, чачывну планларын яшавгъа чыгъармакъ учун къатты буварывлар этди. Чарада районну башчысы М.Амиралиев юртланы башчыларына декабр айны 1-не топуракъ, мал-матагь налогланы толу жыйылывун болдурмакъ учун тапшурувлар берди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
