Чакъсыз сёнген гюл

Балики, балам, дюньягъа гёрюп гетме гелгендир?!

Яшамай гетегенин яш юреги билгендир?!.

Яра бола юреклеге сёзден тиеген.

Яра бола гюллеп бакъгъан гёзден тиеген.

Яра бола хынжаллайын янып оьтеген.

Яра бола ана жанын гьалсыз этеген.

Бу яраны суратлама гюч ёкъ тилимде.

Баламдан сонг гюлле батгъан онгсуз ериме.

Кёгюмню гёк туман басгъан ала-саладан.

Арчылмагъа бажарылмай тийген ярадан.

Эсде ёкъдан тартып-тутуп, бугъавлап.

Байлап мени асмакълагъа асгъандай.

Кёклер чартлап, тюшюп мени уьстюме.

Дюнья гелип, гелип мени басгъандай.

Нетегенни билмей къалгъанман адап.

Даимликге бал баламдан айрылып.

Юрегим атыла, чыкъмагъа тура,

Оьзбашына къаркъарамдан майрылып.

Гечемеди, гюнмеди шо билмедим.

Даимликге бал баламны тас этип.

Кёклер кёкреп, телиянгур себелеп,

Гёзьяш тёкдю, балам, сагъа яс этип.

Тарлыкъ этди, балам, сагъа яшама,

Дазуву ёкъ артсыз-алсыз дюнья генг.

Гёзлеримни туман басгъан, чарс басгъан.

Сенсиз оьтген бир гюнюм, бир йылгъа тенг.

Гетдинг-гетдинг, къызым, менден арекге.

Сёнмейген от ягъып яралы юрекге.

Мен гьали де халкъ арадан сени излеймен.

Хапарсыз чыгъып гелер деп гёзлеймен.

Ананг булан тыныш алып, бал балам.

Геч-тез демей уьстюбюзге етединг.

Ата-ананы юз-минг ойлу жанына.

Азиз балам, шунча сингип нетединг?

Беш йыл оьтдю, балам, сенсиз яшайман.

Ойлай туруп, сени оьтген ёлунгну.

Айсыз кёкге телмиргенмен, танг къатмай,

Сайки, къысып тутгъан йимик къолунгну.

Ёкъсан, балам, учуп-учуп етединг.

Муна, нече танглар къата къызарып.

Гелсенг балам, гёнгюбюз хош этединг.

Ананг барман суратынга бозарып.

Къайгъыланы заманлар сав эте дей.

Заман огъар къыячалап оьте дей.

Беш йыл оьтдю, балам, гиргени къара ерге.

Тек яллыкъ ёкъ юрекге, батгъанман къайнар терге.

Оьрчюге ойларым, гючсюз сан-саным.

Башымны гётерме къоймай талчыкълар.

Чыгъаман абзаргъа, гиремен къайтып.

Сёнген гёнгюм, сюзе эртенги чыкълар.

Школангны оьрлендирдинг, гётердинг.

Коллективинг даим алгъа бурадынг.

Оьзге бирев ойлашмагъан затланы

Оьзюнг ойлап, оьзюнг билип къурадынг.

Школанга тарыкъ буса тармашып.

Къурма, тизме къайдан да ёл аладынг.

Гьар ишинге, гьаракатынга къарап,

Азиз балам, гьайран болуп къаладыкъ.

Школам деп, уьй-эшик деп чабадынг.

Ана гёнгюн алма заман табадынг.

Сююп бакъгъан гёзлер сени аралап,

Талайынга туман басды яралап.

Дюнья сагъа, сен дюньягъа гьасирет,

Гетдинг, балам, ярты къалды ишлеринг.

Сен гетгенли дерт денгизге батылып.

Яшлыгъына яшмын урду яшларынг.

-Эки уланым, эки тав-деп турадынг

Гьали олар салландыргъан башларын.

Атасы бар, гьар макътавлар Аллагьгъа.

Ата языкъ этмес, балам, яшларын.

* * *

Гёнгюн алма тарыкъ болса гьеч кимни,

Юрек ачар йылы сёзлер табадынг.

Авурлукъдан агь урагъан адамны,

Къайгъыларын енгил этме чабадынг.

Аналыкъ борчларын кютеген кююнг,

Асил къылыкъларынг, тутагъан уьюнг,

Сёзлерингни чалыву солакъ бал йимик,

Юзюнгню ярыгъы толгъан ай йимик,

Сагъа ирия эди, досунг-къардашынг,

Унутма болмайман, аявлу яшым.

Халкъ сени сюеди татлиге тилинг,

Къайынларынга да болмадынг гелин.

Сюювлеринг чачып, солакъдай ирип.

Гетдинг, яшым, чартлап, алды Тенгири.

Къайын ананг Гюлдей гёрсе, кант эте.

- Гёзьяш тёкмей бир гюнюм де оьтмей деп.

Женнет йимик ясап гетген ожакъгъа

Шавла чачма Гюлнаратым етмей,- деп.

Гёз алдымда къайынкъызны келпети.

Бал балама сююп бакъгъан гёзлери.

Табунунгда табан тиреп олтуруп,

Сарнап-сарнап сагъа айтагъан сёзлери.

Анадашлар жанынг чакъы сюеген.

Амалларынг сом алтынгъа тиеген.

Билмей къалды, балам, сагъа нетерин.

Гёрсетмесин дагъы ондан бетерин.

Аврувунгну авур гёрюп, талчыгъып,

Анадашлар, амалларынг, гелинлер,

Уьюн-ишин ташлап, къалды уьстюнгде,

Тавдан-тюзден дарман излей талдылар.

Эм табулмай гетгенинге кюстюне,

Сагъа йылай, сагъа сарнай къалдылар.

Азизлеринг къуллукъ этип тоймады.

Авурлукъну янгыз бизге къоймады.

Къарап болмай эди эрингни юзюне

Ер тапмай эди ол турма оьзюне.

Унутмасман Нюрлюгьаят гелинни,

Авурлукъну хам гётерип алагъан.

Гечелер геч демей, гюндюз тез демей

Бетине бозарып, телмирип къалагъан.

Гелинлеринг Нариятынг, Асият.

Сендей болуп ала мени гёнгюмню.

Ярыкъ этме ёллар излеп айлана,

Анангны туман-чарс гюнюмню.

Клас ёлдашларынг, иш коллективинг.

Сени гетгенингни бек авур алды.

Сыйлы къурдашларынг, сююмлю халкъынг,

Артынгдан бозарып, талчыгъып къалды.

Кимге тарыкъ-гьазир гьукму тизединг.

Халкъынг учун яшамалы къыз эдинг.

Тавлу да языкъсынды, тюзлю де сени.

Гёзьяш тёге айта тез гетгенингни.

Бары халкъгъа булай ярап нечик билгенсен?

Мунча халкъны юрегине, нечик гиргенсен?

Агьлюнг сувда, пароходда шунча йыл,

Айлар булан къалса да сен инжинмей,

Юртда яшап, уьйлер тиздинг, ясадынг.

Жаваплы ишни жан гиргендей яшнатып,

Гьар абатынг оьлчеп-бичип басадынг.

Иш деп, уьй деп чабувулда турадынг.

Рагьатлыкъны излемединг жанынга.

Енгиллик этмединг, балам, санынга.

Яллыкъсыз оьтген оьмюрюнге, энни янаман.

Неге тюгюл, азиз балам, мен анаман.

Сен гетгенли, балам, юрегимде къыш.

Кёгюмню къара туман басгъан аралай.

Сари япыракъдай саргъайгъан боюмну,

Сан-санымны къайгъы басгъан, яралай.

Юрегим йылай, йылай сан-саным.

Юрекни тамурлары къысыла бара.

Азиз балам, энни къачан сав болур,

Юрегиме бу сенден тийген яра?

Азиз балам, авур этдинг ананга.

Юрегим тутулгъан къушдай атыла.

Сынташынга янгыдан баш иемен.

Ойларым теренлерден тартыла.

Азиз балам, уьлгю болдунг кёплеге.

Дос-ювукъну сукъландырып яшадынг.

Гетдинг, балам, къарамайлы артынга.

Чакъсыз сёнген къызыл гюлге ошадынг.

Сет-мет тюгюл къатнамайман уьюнге.

Абатларым ожагъынга алынмай.

Гёрсем, балам, сен турмайгъан ожакъны

Боюм яллай, бал балам, от ялындай.

Къызынг тувгъан, гелдим гене уьюнге.

Юрек гьалек, юрек ура юз токъсан.

Алда йимик, гюн шавладай ачылып,

Ана жанынг къаршылама сен ёкъсан.

Гюл тереклер савунгда сен оьсдюрген,

Гюл ийиси гёзлеринге урагъан.

Абзар-уьйге шавла чачып турагъан.

Бюкюреген, кепген, сёнген, гёнгю чарс.

Олар сагъа тутгъан йимик, балам, яс.

Къабурунга гелип юрек ачаман.

Гёрмеге болмайман янынга гирип.

Баврум яна, неге битип къалмайман.

Азиз балам, май чыракъ йимик ирип.

Тенглилеринг гёрсем, балам, нетейим?

Ерлер къатты, гирип нечик гетейим?

Яда къаршылама гьавлап чабарман.

Оьзюме турма ер къайдан табарман?

Энни, балам, мен оьлгенде уьстюмде.

Къатты йылап, къайнар гёзьяш тёкмессен.

Сойралгъан ананга сагъынчлы къарап.

Сорукъгъан гёзлеримден оьпмессен.

Атынг къойгъан Гюлнара да бой сала.

Сени учун да атынг къойгъан яшасын!

Адамлыгъы, берекети, рагьмусу,

Къылыкълары, балам, сагъа ошасын.

Гьасирет къалдынг бавурунга басмагъа.

Оьбюп-оьбюп яшларынгны яшларын.

Бир уланынг, уьч къызынг бар, бал балам.

Сыйпамассан сен оланы башларын.

Халкъ атынгны балтатытып эсгере.

Савда йимик эте сени абурунг.

Женнет бавдай, гелин уьйдей безенсин

Азиз балам, сени ятгъан къабурунг.

Азиз балам, гетдинг бизин бозлатып.

Уясындан учгъан къушгъа ошайсан.

Келпетинг бар сен гетсенг де гетмейген.

Юреклени тёр янында яшайсан.

Тенгириден гелген ишге амал ёкъ

Сёзюм къысгъа, дагъы айтма зат билмеймен.

Аналагъа балаларын тас этген.

Аллагь, сенден мен сабурлукъ тилеймен.

Къалгъан авлетлерим, Аллагь, сагъа аманат.

Оларсыз яшавума Гюн не Ай чыкъмай.

Анаман чы къан териме оьсдюрген.

Къайсы ана баласына талчыкъмай?

Азизлерим! Магъа айып этмегиз,

Бу къайгъыны булай авур алгъангъа.

Сиз чи мени гёзлеримни нюрюсюз,

Оьлген языкъ, амал болар къалгъангъа.

Бала гетсе, ана юрек ялында.

Къайгъыланы етмес огъар гьеч бири.

Оьзюнг берип, артда оьзюнг алгъансан.

Ондан бетеринден сакъла,Тенгири!