Асгерге чакъырыв – 2020

Бизин районбузда оьсюп гелеген яшёрюмлени асгерге чакъырыв гьакъда баянлыкълар алмакъ муратда Избербаш шагьаргъа, Къаягент ва Къарабудагъгент районлагъа жаваплы военный комиссариатны 2-нчи бёлюгюню ёлбашчысы Рустам Агьматов булан ёлукъдукъ ва шо гьакъда маълуматлар алдыкъ.

Р.Агьматовну баянлыкъларына гёре, уьч де муниципал къурулувдан 200-ден де къолай ватандаш асгер борчун кютмек учун чакъырылажакъ. Демек, 18 йылдан 27 йылгъа ерли оьмюрю булангъы ватандашлар оьр ва орта хас билимли болмагъа герек. Олай да, асгер борчун кютмек учун «В, С, Е» ва «В, С, D» категориялы машинлени гьайдамагъа шагьатнамалары болмагъа тарыкъ.

Военный комиссариатны жаваплы къуллукъчусу Р.Агьматов эсгерген кюйде, асгер борчун кютмеге борчлу яшёрюмлер инг башлап докторлардан къурулгъан хас комиссиядан оьтмеге герек. Демек, оланы савлугъуна тындырыкълы кюйде тергев болдурулмагъа тарыкъ.

Эсгерилген комиссияны Къарабудагъгент районну башчысы Магьмут Амиралиев оьзюню хас буйругъу булан къура ва шону ишин график булан белгилей.

Олай да, Р.Агьматовну сёзлерине гёре, бир гюнню ичинде хас комиссиядан асгер борчун кютмеге чакъырылгъан 50 ватандаш оьте.

Бизин булангъы лакъырыны ахырында Избербаш шагьаргъа, Къаягент ва Къарабудагъгент районлагъа жаваплы военный комиссариатны 2-нчи бёлюгюню ёлбашчысы Рустам Агьматов айтгъан кюйде, федерал законгъа гёре, асгер борчун кютювден башкъачырагъанлагъа жавапчылыкъ артажакъ ва олар такъсыргъа тартылмагъа бола.