Тилни уьйренмек ва билмек – борч

Шоллукъда, 26-нчы октябрде Къарабудагъгент 3 номерли орта мактапда да шолай чара оьтгерилди. Чараны эсгерилген мактапны ана тилден ва адабиятдан муаллими Русайдат Канзитдинова онгаргъан эди.

Чараны барышында 9-нчу «а» класны охувчулары къумукъ шаирлени шиъруларын гёнгюнден охудулар. Оланы шиърулары ана тилге, ата юртгъа, оьз элине ва Ватанына багъышлангъан эди.

Чарагъа «Районну яшаву» газетни баш редакторуну орунбасары, шаир ва журналист Багьавутдин Самадов къонакъ гьисапда чакъырылгъан эди. Чараны юрютювчю муаллим Р. Канзитдинова муаллимлеге ва охувчулагъа ­Б. Са­мадовну гьакъында маълуматлар берген сонг, шаирге оьзюгер сёзню тапшурду.

Шаир ва журналист Багьавутдин Самадов чараны онгаргъан Къарабудагъгент 3 номерли орта мактапны муаллимлерине ва 9-нчу «а» класны охувчуларына разигин билдире туруп, оьсюп гелеген наслубузгъа ана тилин билмеге, уьйренмеге, таза сакъламагъа ва наслудан-наслугъа бермеге борч экенлигин ачыкъ этди. Яшлагъа болгъан чакъы ана тилинде сёйлемеге чакъырды.

Чараны ахырында шаир ва журналист Багьавутдин Самадов муаллимлени ва охувчуланы тергевюне оьзюню бир нече шиърусун чебер кюйде охугъан сонг, 9-нчу «а» класны охувчуларына «Умут» ва муаллимлеге буса «Сизден дуа тилеймен» деген китапларын савгъат этип тапшурду.

Мактапны завуч-къурувчусу Таскират Пашаева ва 9-нчу «а» класны клас ёлбашчысы Айида Мутдагьирова оьзлени иш ёлдашына ва Б. Самадовгъа баракалла билдирди

Эсделикге суратлар чыгъарылып, чара тамамланды.