Меню
16+

Сетевое издание «Будни района»

23.10.2020 09:58 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Районда субботник оьтгерилди

Автор: Нюрсагьадат Изамутдинова

«Къарабудагъгент район» муниципал районну башчысы Магьмут Амиралиевни тапшурувуна гёре, октябр айны 10-нда районда оьтгерилмеге герек деп билдирилген субботник шо гюнлерде чакъны бузулмакълыгъы ва елли болгъанлыгъы себеп болуп, дагъы гелеген сонгугюнге, демек, октябр айны 17-не теберил­ген эди. Шолайлыкъда, октябр айны 17-нде районну бары да идараларында, орамларда, ёлларда бютюн район субботник, демек, тазалыкъ болдурув булкъалар оьтгерилди.

Шо субботниклерде район ва юрт администрацияланы къуллукъчулары, билим берив ожакъланы коллективлери ва охувчулар, больницаны, маданиятны, китапхананы, музейни, район газетни, райондагъы ветеринар управлениени, УСХ-ны, МФЦ-ни ва башгъа атлары эсгерилмей къалгъан идараланы коллективлери актив кюйде ортакъчылыгъын болдурду. Олар ёл ягъалардагъы нас-алагъожаланы, оьзлени идараларыны айланасындагъы майданланы тазалады, биналаны тамларына акъ чапды, айлананы тазалыгъын болдурду.

Шо гюн тазалыкъ болдурув ишлеге тергевюн болдургъан районну башчысы М.Амиралиев, ону орунбасарлары И.Абдулмежитов ва Ж.Жамалутдинов этилинген ишлеге багьа берди, этилмегенлерине гёре тапшурувлар бере туруп, дагъы да этмеге тарыкълы ишлени эсгерди.

Гьар ёлугъувда, айрокъда охувчулар булангъы ёлугъувларында районну башчысы ва ону орунбасарлары тазалыкъ бир гюнню иши тюгюл, гьар гюн тазалыкъны болдурмагъа гереклиги гьакъда эсгерди. Шо ишге гьар адам, демек, яш да, уллу да тюзевлю янашмагъа, оьзюню къолундан гелеген затны этмеге гереги гьакъда сёйледи.

Тазалыкъ болдурув бютюнрайон субботникде, демек, октябр айны 17-нде «Гьели юрт» муниципал къурулувуну къуллукъчулары, олай да юрт маданият уьюню, музейни, китапхананы ва Гьели школаны муаллим ва охувчу коллективи де ортакъчылыгъын болдурду.

Къарабудагъгент 1 номерли орта школаны 200-ден де къолай оьр класларыны охувчулары клас ёлбашчылары да булан елли чакъгъа да къарамайлы, алда белгиленген кюйде, демек октябр айны 10-нда школасыны айланасын, ял алагъан бавну алдындагъы майданчаны нас-алагъожаларын тазалагъан эдилер, 17-нде ­оьтгерилген субботникде де олар яхшы гьаракат этип, юртдагъы М.Дахадаевни, У.Буйнакскийни атындагъы орамларда, олай да район админист­рациягъа барагъан орамдан айланып, яйылгъан чёплени къаплагъа жыйып, яхшы тазалыкъ этдилер, къаплагъа жыйылагъан чёп-насланы хас машинлер булан нас-алагъожа жыйылгъан ерлеге къотарма йибердилер.

Уллубийавулдагъы «Фиалка» деген 12 номерли яшлар бавуну коллективи де оьзлени иш еринде октябр айны 16-нда тазалыкъ болдурдулар. Олай да, олар яшлар бавунда «Мой дом – наведу порядок в нём» деген дарс оьтгерди. Шо дарсны аслу мурады – яшлар гиччиден тутуп тазалыкъгъа уьйренмеге, оьзюню артындан жыйып юрюмеге, тазалыкъны сюймеге, башгъалар этген ишни хадирин билмеге, тюзевлю янашмагъа уьйретмек эди.

Дарсдан сонг, гиччипавлар да къолушуп, яшлар бавуну абзарында тазалыкъ болдурду. Яшлар кёп сююп бютюнрайон субботникге къуршалды.

«Паравул юрт» муниципал къурулувда да октябр айны 15-16-нда оьтгерилген субботникде савлай юрт ортакъчылыкъ этген деп айтмагъа ярай. Олар Паравулдан Дёргелини дазусуна ерли ёлну боюн тазалап, нас-алагъожаланы жыйгъан. Паравулда этилген тазалыкъ ишлеге тергев этген районну башчысы шо ишге яхшы багьа берген. Дюньяны елеп гелеген коронавирус аврувну алдын алывда оьтгерилеген субботниклер бек ­тарыкъ экенни эсгерген.

Шо гюн субботниклер районну Къакъашура, Манас, Манасгент, Дёргели, Аданакъ ва башгъа юртларында да оьтгерилди.

Районну бары да юртлулары оьзлени юртларында тазалыкъ болдурувда кёп сююп ва актив кюйде ортакъчылыкъ этди.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2