Яшлар бавлары къурула

«Демография» деген милли проектни яшавгъа чыгъара туруп, районубузну ичинде артдагъы йылланы узагъында янгы яшлар бавлары къурула.

Шоллукъда, Жанга юртда 120 гиччипавну къабул этеген ва оланы тарбияламакъ учун янгы яшлар баву ишлемеге башлангъан. Демек, къурулувну юрютеген бирлешивню вакили эсгереген кюйде, биринчи къабатны арматурлары салынгъан, чырлары ишленмеге башлангъан. Олай да, отну сёндюрмек учун къолланагъан сув гьавузгъа къую къазыла тура, подвал къабатны бавукълукъдан сакъламакъ учун ишлер юрюле.

Подрядчик эсгереген кюйде, яшлар бавун къурулувда 37 къурувчу ишлей. Олар ишин юрютегенде Роспотребнадзорну таклифлерин ва талапларын яшавгъа чыгъара.

Олай да, шо гюнлерде ДР-ни къурув ва ЖКХ министрини биринчи орунбасары Мурат Алиев тергев этеген вакътисинде къурув бирлешивню ёлбашчыларындан гёрсетилген болжалны ичинде бары да къурулув ишлени тамамламагъа тапшурду. Эсгерилеген кюйде, бугюн-буссагьат яшлар бавуну къурулувуну гьазирлиги 16 процент.

Шо гюнгю тергевлерде районну башчысыны биринчи орунбасары И.Абдулмежитов «100 школа» деген программагъа гёре Жанга, Ленингент ва Сираги юртларда юрюлеген ишлени барышына да оьзюню тергевюн болдургъан.

Ачыкълашдырып айтсакъ, Ленингентде тарыкълы ишлер тамамлангъан. Сираги юртда 50 кубометр сув сакъланагъан резервуарны къурув ишлери юрюлюп тура.

«Дирекция Единого заказчика-застройщика» ГКУ-ну ва ДР-ни къурув ва ЖКХ министрини биринчи орунбасары оьзлени тергев сапарларында къурув бирлешивлеге бойнуна алгъан ишлерин тындырыкълы кюйде гёрсетилген болжалны ичинде битдирмеге ва районну администрациясыны ёлбашчыларына олагъа къатты кюйде тергевюн болдурмагъа тапшурду.