Яшланы сюеген муаллим
Дюньяда муаллимлик касбуну ким буса да сайламагъа ва ону тийишли кюйде юрютмеге болмай.
Гиччи яшлагъа муаллим болмагъа сюеген адам яшлагъа тарбия булан бирче билим бермеге де белсенме тарыкъ.Школаны тамамлап, башгъа охув ожакълагъа тюшсе де, охувчу яшланы юреклеринде биринчи муаллими даимге эсде къала.
Неге тюгюл де, билимден бир де англаву ёкъ школагъа гелеген гиччипавлагъа биринчи гьарпланы, санавланы биринчи муаллим уьйрете.
Биз барыбыз да муаллимлерибизни алдында савлай яшагъан оьмюрюбюз бар чакъы борчлубуз.
Мен оьзюню гьакъында язмагъа сюеген Абакарова Нюрбият Магьамматовна 1966-нчы йылны ноябр айыны 11-нде тувгъан. Школаны охуп битдирген сонг, Нюрбият Буйнакск шагьардагъы муаллимлени онгарагъан училищеге билим алмагъа охумагъа тюше.
Оьзюню биринчи муаллим чалышывун Нюрбият Магьамматовна Аданакъ юртдагъы школада башлай. 1987-нчи йылдан башлап Н.Абакарова Манасгент орта школада загьмат тёгегени 33 йыл бола.
33 йылны узагъында Нюрбият Магьамматовна юзлер булан билимсиз яшлагъа билим берген, англавсуз яшланы билим алыв дюньясына гийирген. Ол оьзюню касбусун бек сюе деп айтсакъ, бир де янгылышмасбыз.
Охувчуланы, ата-аналаны арасында абуру бар Нюрбият Магьамматовнагъа иш ёлдашлары абур ва гьюрмет эте.
Олай да, школада ишлеп турагъан яш муаллимлеге Нюрбият Магьамматовна уллу уьлгю ва тарбиялавчу.
Кёп йылланы узагъында Н.Абакарова оьзюню ишинде яхшы натижалар гёрсетип ишлеген.
Н. Абакарова школагъа биринчилей аякъ басгъан гиччипавлар гележекде яхшы ва гьакъыллы адамлар болсун учун оьзюню бары гьаракатын салып ишлей. Нюрбият Магьамматовна оьзюню уьягьлюсю булан 6 яшны тарбиялагъан. Биз Нюрбият Абакаровагъа гиччи яшланы билим берив ва тарбиялав ишинде уьстюнлюклер ёрай туруп, савлукъ, насип, берекет ва узакъ оьмюр ёрайбыз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
