Меню
16+

Сетевое издание "Району яшаву"  «Будни района»

02.10.2020 10:30 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Сююмлю муаллим

Автор: Нюрсагьадат Изамутдинова

«Адам оьзю гьакъыллы да, яхшы да, рагьмулу да болгъан сайын, ­оьзгелерде де рагьмулукъну ва яхшылыкъны тез гёре», — деп язгъан белгили орус язывчу Лев Толстой. Къарабудагъгент 2 номерли орта школада математика дарсланы юрютеген муаллим Мигьратова Барият Мутасимовнаны гьакъында шолай адамланы бириси деп айтсакъ, тюз болур. Барият Мигьратова – гертилей де, бек рагьмулу, гьар адамда да яхшылыкъны биринчилей гёрме сюеген адам. Ол бир де этген иши, етишген уьстюнлюгю булан дазуланып токътайгъан муаллим тюгюл, гьар гюнлюк гьаракаты булан алгъа багъып талпына. Б.Мигьратованы школада ишлейгени 35 йыл бола. Школаны охувчулары, муаллимлери ва ата-аналар учун ол макътавлу, инг де абурлу муаллим. Барият Мутасиевна гьар охувчуну юрегине ёл тапма бажаргъан.

Ол охувчуланы математика илмуну гьиллаларына, илмуну яшыртгъын сырларына тюшюндюре, олагъа дарслар къужурлу оьтсюн деп къолундан гелеген гьаракатны эте. Барият Мутасиевнаны дарсларында охувчулар бир-бирине де, муаллимине де бек гьюрметли янаша, билимлеге ес болмагъа гьаракат эте, бир-бирине кёмеклеше, уьстюнлюклерине сююне, билмейгенлерин сорай, билегенлерин айта. Талаплы ва бажарывлу, оьзюню касбусуна толу кюйде берилген муаллим охувчулар булан тез гьаллашып, оланы оьзюгер тынглатып бажара. Ону охувчулары муаллими дарсланы маъналы ва рагьат къайдада англатагъанны, англамай къалгъан затны янгыдан-янгыдан айтып, охувчулагъа етишдиргенни бир-бирине айтып, муаллимине разилигин билдире.

Барият Мигьратова ишине толу кюйде берилгенлиги гьакъда ону охувчулары кёп эсгере. Ону алдында тарбиялангъан выпускниклери гьар тюрлю тармакъларда уьстюнлю кюйде чалышагъаны да шогъар ачыкъдан шагьатлыкъ эте. Олар барысы да муаллимине разилигин билдире. Б.Мигьратова берген билимлер ону выпускниклери учун яшавда оьз ерине сайлангъанда герти ориентир болуп токътай.

Барият Мутасимовна бажарывлу муаллим экенинден къайры да, татывлу ожакъны есиси, яшланы анасы да дюр. Ол уьягьлюсю булан бирче 4 яшны тарбиялап оьсдюрген.

Муаллимни гюнюню алдында Къарабудагъгент 2 номерли орта школаны муаллим ва охувчу коллективи сююмлю муаллим Барият Мутасимовнаны касбу байрамы – Муаллимни гюню булан къутлай. Оьзлер де ондан уьлгю алып ишлейгени гьакъда айта туруп, огъар къатты савлукъ, ишинде уьстюнлюклер, агьлюсюне кёп яхшылыкълар ёрай.

Биз де шо къутлавлагъа ва ёравлагъа кёп сююп къошулабыз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5