Сынавлу муаллим
Муаллимлени касбу байрамыны гюнюню алдында бек пагьмуллу ва асил къылыкълы, бугюнлерде Къакъашура 2 номерли орта школаны директоруну биринчи орунбасары Ширавова Папа Юсуповнаны гьакъында сизге хабарлама сюемен.
Папа Ширавова оьзю де муаллим ва Венгрия давну ортакъчысы Юсуп Ширавовну ва Саниятны агьлюсюнде тувгъан. Папа Ширавова – айрыча гьакъыллы, сюйкюмлю, билимли муаллим. Ол – герти ана, йымышакъ ва илиякълы хасиятлы, яшлар сюеген, адамланы арасында болгъур адам.
Олай да, Папа Ширавова биринден-бири асил къылыкълы ва исбайы эки кьызны оьсдюрген ва тарбиялагъан. Олар да бугюнлерде, анасыны ишине табиъ болуп, школаларда загьмат тёге. Ол халкъ арада адамлар сукъланардай яшавун къурмагъа бажаргъан.
Папа Юсуповна Ширавова 1965-нчи йылда июн айны 29-нда Къарабудагъгент районну Къакъашура юртунда тувгъан. Къакъашура орта школаны битдирген сонг, ол 1980-нчи йылда Избербашдагъы педагогика училишеге охума тюше. 1984-нчю йыл шону битдирип, Къакъашура орта школада муаллим болуп иш башлай.
1989-нчу йыл П. Ширавова Дагъыстан пачалыкъ педагогика иститутну индустриал-педагогика факультетине охумагъа тюше, 1994-нчю йыл охув ожакъны тамамлап, оьр билимге ес бола.
Папа Ширавова школагъа оьзюню савлай яшавун багъышлагъан муаллим, ишни сыйлылыгъын билип, англап, оьзюню савлай касбугъа берген деп айтмагъа ярай. Ол школада иш гёрегени 36 йыл тамамлана. Ол дагъы да школада муаллим ишинден къайры завуч-къурумчу болуп да ишлеген. Бугюнлерде буса Папа Ширавова билим берив бёлюгюню орунбасары болуп ишлей.
Папа Ширавованы охувчулары район олимпиадаларда 1-нчи, 2-нчи ва 3-нчю ерлени къазангъан.Олай да, ол республика ва Бютюнроссия конкурсларда лауреат атлагъа ес болгъан. 2015-нчи йыл Папа Ширавовагъа «Дагъыстан республиканы ат къазангъан муаллими» деген сыйлы ат берилди.
Къумукъланы «Гьаракатгъа – берекет» деп, кёп терен маъналы айтыву бар. Папа Ширавова оьзюню ишин ва яшавун шолай тутгъан ва юрютген деп айтмагъа тийишли.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
