Оьз ишини устасы

Муаллимлени ожагъында тарбиялангъан Мадина Зайналова яшлайын юреги гьасирет кюйде танглагъан касбугъа ес болма токъташа ва 1974-нчю йылда Дагъыстан Пачалыкъ институтну филология факультетине охума тюше. 1978-нчи йылда эсгерилген оьр охув ожакъны яхшы къыйматлар булан тамамлап, Губден юртдагъы сегиз йыллыкъ школада оьзюню загьмат ёлун башлай. 1979-нчу йылда сентябр айны 1-нде Мадина Зайналова Къарабудагъгент сегиз йыллыкъ школагъа бакъдырыла.

Ишине мекенли тюшюнмесе, гележекде гёрмекли натижалар къаравуллама къыйын болагъанны анг­лайгъан Мадина Зайналова гьар дарсгъа тындырыкълы кюйде янаша, охувчулар булан тыгъыс байлавлукъ юрютюп, оланы пагьмуларын артдырып, орус тил ва адабият предметлени сюйме уьйрете.

Оьзюню предметине гьакъ юрекден янашагъан Мадина Зайналова гьар дарсында охувчулагъа таъсир этеген кюйде чебер асарланы маънасын ачыкъ эте, яшавда болуп турагъан ишлер булан тенглешдире.

Муаллим Мадина Къазимагьамматовна охувчулагъа билим берегенден къайры да, олар булан тарбиялав ишлени де юрюте. Сынавлу муаллим яш муаллимлер булан да сынав алышдыра. Ишин билеген, бажарывлу муаллим оьзюню дарсларында тюрлю-тюрлю янгы къайдаланы къоллай. Ол оьтгереген ачыкъ дарсларда охувчулар актив кюйде ортакъчылыкъ болдура.

Яшланы билимине янгы ёл ачагъан, оланы билим дюньяны теренине элтеген Мадина Зайналова яш охувчуланы нече-нече наслусун яшав ёлуна салгъан. Ону алдында тарбиялангъан яшлар оьр ва хас орта ожакъланы тамамлап, гьар тюрлю къуллукъларда чалыша.

Ишине гёре М.Зайналова район администрацияны, билим берив управлениени атындан кёп санавда гьюрметлев грамоталар булан савгъатлангъан. Ону охувчулары район оьлчевде оьтгерилеген олимпиадаларда, конкурсларда ортакъчылыкъ этип, алдынлы ерлеге ес болгъан. Мен де бу байрам гюнню алдында бары да иш ёлдашларымны Муаллимни гюню булан къутлап, ишинде оьрлюклер, агьлюлери булан татывлукъда яшамакъны ёрайман.