Меню
16+

Сетевое издание "Району яшаву"  «Будни района»

02.10.2020 09:17 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Нурьяна Арсланова «Мени эсге салардай…»

Уланлар оьсдюрген аналар…

Уланлар оьсдюрген аналар

Насипни тёрюнде яшайдыр.

Аршлардан учмагъа болардай

Къанатлы бир къушгъа ошайдыр.

Уланлар оьсдюрген аталар

Дюньядан парахат гетедир.

Атасыз къоягъан къызларын

Олагъа аманат этедир.

Тилевюм къабул эт, Аллагьым…

Къайгъыдан дёндюрме яшларын –

Атамны гюнлерин санама.

Дертлерден тюйдюрмей къашларын,

Оьмюр бер, Тенгирим, Анама.

Байлыкъны аршлагъа чюймеймен,

Сёнмес от якъмасын башымны.

Къоркъаман оьтесиз, сюймеймен

Къайгъысын гёрмеге яшымны.

Атасыз яш къушдур къанатсыз,

Шондан авур дерт ёкъ балагъа.

Яшларым къалмасын Атасыз,

Къанатсыз гюн берме олагъа.

Къайгъылар гёрсетмей гёзюме,

Дертлерден тюйдюрмей къашларым,

Оьмюр бер, Тенгирим, оьзюме –

Анасыз къалмасын яшларым.

Гече ялгъан…

Гече ялгъан, гюн де ялгъан,

Бары зат ялгъан.

Къысмат ялгъан – сени менден

Урлапдай алгъан.

Бир болмасгъа ант этгендей

Тийип де ашгъа,

Мени ёлум башгъа болду,

Сеники башгъа.

Эки тюрлю ёллар булан

Барабыз юрюп.

Бир-биревсюз, бир-биревсюз

Оьмюрлер сюрюп.

Оьзю сююп айыргъан сонг

Ёлумдан сени,

Аллагь бизин бир-биревден

Сакъласын энни.

Тилевлери анамны

Аттагьият охуп, башын бурса да,

Азиз анам, намазлыкъда олтуруп,

Дуа булан тилей бола Аллагьдан,

Нюр гёзлерин гёзьяшлардан толтуруп.

Тилевлерин эшитмеймен, билемен –

Анам тилей парахатлыкъ ерлеге.

Аналаны инг биринчи тилевю

Неге таъсир этмей, гьейлер, бирлеге?

Бирдагъы да, эшитмейли билемен,

Тилейгенни яшларына насиплер.

Аналагъа сорап насип пайланса,

Ер юзюнде болмас эди касиплер.

Ана биле, яшлар бола насипли,

Ата-ананы гьалаллыгъын алгъанда,

Ата-ананы шат юзлерин гёргенде,

Ата-анагъа алгъыш тилей къалгъанда.

Иманындан чыкъмасын деп тилейдир

Бусурманны нарыстасы, баласы.

Йыллар бою яшап-яшнап къалсын деп

Агьлю деген атлы сююнч къаласы.

Тилевлери минглер булан, билемен,

Къуршар йимик инсаны кёп аламны...

Анамдан сонг намазлыкъда олтуруп,

Гёзлеримни гёзьяшлардан толтуруп,

Мени буса бир тилевюм Аллагьдан –

Къабул эт деп тилевлерин анамны.

Нечик оьтермен

Мени уьюм, яшым-башым,

Сеники де шо кюйде,

Дерт тюйдюрген гёзюнг-къашынг,

Меники де шо кюйде.

Йыллар сени алышдыргъан,

Мен де башгъа болгъанман,

Тек алдындай гьислериме

Гьалал кюйде къалгъанман.

Болагъаны болгъан энни,

Алгъасама ер де ёкъ,

Рази тюгюл юрек буса

Къайтып гьалек эртенокъ.

Болса болсун, огъар да мен

Бир амаллар этермен,

Чыдамасдай сагъынсам да

Азиз гёзюнг-къашынгны.

Тек шо бизин орамлардан

Оьтюп нечик гетермен,

Ойнай туруп гёрсем онда

Мен тапмагъан яшынгны

Сени гёрсем

Сени гёрсем, сююнч сыймай тёшюме,

Ялын оьтюп яллай эди яякълар,

Гёрмей къалсам сагъынчлыкъдан саргъайып,

Сизге багъып юрюй эди аякълар.

Къайда къалды, къайда гетди, не болду

Гёнгюлюмню чечек ачгъан гюллери?

Гюнгюрт гюзню гюзгюсюне ошады

Яшавумну яшнар йимик гюнлери.

Энни мени гюн де болмай иситме,

Тек сен оьзюнг менсиз де бек хошлусан.

Яшлыгъымны, яллыгъымны яллатгъан,

Сен чи магъа янгы яшав борчлусан.

Йырларымда яшажакъ

Шаир – артист, тюрлю роллар ойнайгъан,

Бир ролдан сонг башгъасына гёчеген.

Амма жангъа герти къыйын болгъанда,

Акъ кагъызгъа герти сырын чечеген.

Йырларымда язсам ону язайым,

Минг сююп, юз айырылыв сезмедим.

Балжибиндей, гюлден гюлге гёчеген,

Сююв излей гюл таладан гезмедим.

Къысгъа оьмюрде минг сюймейли бир сюйдюм,

Бир сюйгеним оьмюрюме болардай.

Сюювюмню тазасына, агъына,

Сюзюк сув да бираз гюллеп къарардай.

Минг игитлер елесе де йырларым,

Бир игит бар юрегимни елеген.

Не сатырны бир оьзюне багъышлап

Язгъанымны сорамайлы билеген.

Бир игит бар... осуз къалса юрегим,

Насиплерден даимликге бошажакъ.

Жаным мени учгъан сонг да кёклеге,

Ерде къалгъан йырларымда яшажакъ.

Чакъгъа артыкъ инанаман

Тюнегюнгю язгъы гюндей чагъыбыз

Боран алып барагъандай бугюнге.

Мени булан къайгъырадыр табиат

Инамсызлыкъ салгъан дертден тююнге.

Язгъы гюндей бир иржайып багъасан,

Бир де ёкъсан язда янгур чакъы да.

Чакъдан да чалт тюрленеген сюювге

Гьайран бола табиатны чагъы да.

Янгур явуп, бары ерни сув алар,

Елден чачлар етти янгъа чачылар.

Амма артда болмагъандай ёкъ болуп,

Ай-гюн чыгъар, ерлер-кёклер ачылар.

Ахыр бир гюн ачылажакъ чакъ йимик,

Сюювюнг де «ачылар» деп белсенмен.

Бир гюн бою бир минг тюрлю болса да,

Чакъгъа артыкъ инанаман сенден мен.

Гечермен

Эришербиз, бир-биревге

Сёйлемей де турулар.

Хатирлени гючлюсюнден

Башлар янгъа бурулар.

Тек ахырда ойлашарбыз,

Гертиликни тангларбыз.

Ахырда биз юреклени

Сеслерине тынгларбыз.

Бирден эки башлагъанда

Язлар къышгъа ошама,

Болмайгъанны англагъанда

Бир-биревсюз яшама,

Гюл ёлума нюр яярсан,

Янгыдан сыр чечермен.

Сен де магъа иржаярсан,

Мен де сенден гечермен.

Аналаны байрамы

Аналаны байрамы

Ювукъ бола гюн сайын,

Анам учун лап яхшы

Савгъат тапма не къыйын!

Гечелер гелмей юхум,

Уллу ой тюшген магъа.

Арив-арив савгъатлар

Акъчам да ёкъ алмагъа.

Бола бусам анама

Кёп гюллер жыяр эдим.

Анам юрюйген ёлгъа

Барын да яяр эдим.

Болмасам да гюл жыйып,

Къой, этейим адатын,

Уллу-уллу кагъызгъа

Шо гюллени суратын.

Бираз уллу болайым –

Бары гюлню жыярман!

Анам юрюйген ёлгъа

Барысын да яярман!

Мени эсимде

Анасы авруп ятгъан

Агъаргъан юзю.

Ананы эси тайгъан,

Ачылмай гёзю.

Мюгьлетге сама улан

Таймай янындан.

Къайгъыра анасына

Азиз жанындан.

Эргиши гёзден гёзьяш

Токътавсуз агъа…

Доктор, бёлюп къайгъысын,

Эшикни къагъа:

– Сен мунда тургъан булан

Огъар гюч гелмес.

Анангны эси ёкъ, ол

Гетсенг де билмес.

– Анама гюч къайтарма

Къудрат Ессимде.

Ол оьзю ким экени

Мени эсимде.

Насиплимен

Насиплимен, яшав ёлда

Сюрюнмеге къоймайгъан

Атам баргъа, гюлдей анам,

Оьзлерден мен тоймайгъан.

Насиплимен, яшларымны

Иржайыву баргъа да,

Халкъгъа бакъгъан сюювюме

Уллу дюнья таргъа да.

Насиплимен, абур баргъа

Атам берген атыма,

Юрегимде оьчлюк ёкъгъа

Ювугъума-ятыма.

Сюювю ерлеге сыймай

Етти кёкде саркъагъан,

Насиплимен адам баргъа

Менсиз къалма къоркъагъан.

Ай булангъы ёлугъув

Бу гече де тереземе ай бакъгъан.

Ойлашаман не насипли гече деп.

Кёкню гёзел юлдузларын унутуп,

Мени булан оьзю ай сыр чече деп.

Сыр да чечип, булут артгъа яшынды.

Шо мюгьлетде умутларым уьзюлдю.

Тюлмю, тюшмю – англамагъан кююмде

Танг да къатды, къарангылыкъ сюзюлдю.

Ойлашадым, тереземе бакъгъан ай,

Сигьрулукъну ярыкъларын якъгъан деп.

Сав дюньяны гёзеллерин унутуп,

Янгыз мени тереземе бакъгъан деп.

Сигьрулукъну ярыкъларын якъмагъан…

Янгыз мени тереземе бакъмагъан…

Мени эсге салардай

Юлдузлар кёп, санав ёкъдур олагъа,

Тек бири бар айрыча бек янагъан.

Бу гече де мени янгыз къоймай о,

Юм-чум этип, тереземден къарагъан.

Бир заманлар бир сюйгеним бар эди,

Мени булан сююв-дертин бёлеген,

Шо юлдузгъа, айрыча бек янагъан,

Жаным нечик гьасиретни билеген.

Юлдуз болуп сюйгениме янмадым…

Гелин болуп гирмесем де уьюне,

Мен шагьатман, айырылыв бичакълап,

Гёзлерини сувланагъан кююне.

Яна юлдуз бийкесидей кёклени,

Шавласындан дюнья леззет алардай…

Сагъынч бувгъан ай ярыкълы гечелер,

Сюйгениме мени эсге салардай.

Къалгъан буса

Бир йыл къалгъан буса магъа яшама

Уьч гюнлюк бу пана ерни юзюнде,

Минутун да зая этмей йылымны

Сюер эдим тынглап турма сёзюнге.

Бир ай къалгъан буса магъа яшама

Гьар мюгьлетин сени булан бёлмеге,

Сюер эдим... артыкъ насип ёкъдур деп,

Къолларынга къолум салып оьлмеге.

Бир гюн къалгъан буса магъа яшама,

Насипге ёл салар эдим, аявлум,

Ерни юзюн гезеп, эллеп, къайдан да

Бар ерингни табар эдим, аявлум.

Къаравунга байлагъан сонг къаравум,

Сорагъан сонг ахырынчы соравум,

Къалам алмай ахыр гьисим язмагъа –

Оьзюм башлар эдим къабур къазмагъа.

Ёрамасын

Аврув ятгъан кепсиз, кюйсюз, саламсыз,

Не ой гелмей бугюн тилсиз юрекге.

Бек алгъасап оьлме сюймей, амалсыз,

Жагьиллени тою болма герекге...

Дос-къардаш да огъар арив къарайлар:

Узакъ къалмай тойну гюню етежек.

Тамазагъа узакъ оьмюр ёрайлар,

Оьлюп къалса, тойгъа пуршав этежек.

Юрек къысып, гёзню яшдан толтуруп,

Масъаланы терени бар ой учун.

Дос-къардашым башлыгъымда олтуруп,

Магъа оьмюр ёрамасын той учун.

Бюрюшежек бетлери

Бираз алда болгъан шулай заманлар,

Уллулагъа уллу абур этеген,

Тамазагъа абур этип жагьиллер,

Очар алда яшын къоюп гетеген.

Бираз алда болгъан шулай заманлар,

Къартыллайгъан, къарап ата гёзлеге.

Гьали буса тавдай уллу юреклер

Пачагъадай абур сюе оьзлеге.

Иржаймайгъан бир ананы билемен,

Гёнгю ону сююнчлеге ябулгъан –

Жагьилинде дёрт къыз тапгъан анагъа

Къарт болгъанда бир гелини табулгъан.

Дюньяны бу гьалларына къарасакъ,

Зым-зым эте юреклени этлери...

Оланы да йыллар гючюн алажакъ,

Бюрюшежек оланы да бетлери...

Ана тилим

Гьар адамны оьз алдында

Инг де аслу борчу бар –

Ана тилин, ана элин

Анасындай якъламакъ,

Хапарсыздан тюшюп къалса,

Сынарындан къоркъагъан

Батманныдай, яхшы аяп,

Тюшме къоймай сакъламакъ.

Ана тил бир кёмек тарыкъ

Гиччи яшдай гёрюне:

Гьарибизден бир айрыча

Сююв, исив гёзлей о,

Тамур бошап, авма бакъгъан

Терек йимик бир-бирде,

Гьарибизден кёмек тилеп,

Таяв, тирев излей о.

Ана тилни башын чёгюп,

Мунгайгъаны яш йимик,

(Шо вакътиде юрек сызлай,

Етти ерден гесиле)

Гьатта эки менмен деген

Къумукъ бири-бирине,

Илыкъмайлы орус тилде

Сёйлейгенде сезиле.

Ана тилим, алтын тилим,

Арасында кёплени,

Жандай азиз анамныдай

Сюйме сени мен барман,

Ер юзюнде мендей сени

Сюер бирев бар чакъы,

Къыл уьзюлюп, сагъа оьлюм

Етерине инанман.

Ана тилим, гюнеш йимик

Ярыкъ тилим, бай тилим,

Аршда янгъан инг де гёзел

Акъ юлдузгъа ошайгъан…

Хадирингни билегенлер

Бар болсунлар, бар болсун,

Сагъа артсыз алгъыш ёрап,

Оьмюр ёрап яшайгъан.

Ана тилим, алтын тилим,

Болгъур тилим, бал тилим…

Оьктем кюйде бугюн сени

Алдынгда баш иемен,

Къумукъ къандан тувгъанлардан

Тувгъанланы тилинде

Даимликге яшагъанынг,

Яшнагъанынг сюемен.

Биревге де бермежекмен, бермежек...

Гюн иржайтгъан гюл бавлардан гезетип,

Яш башымны басып исси бавруна,

Биревге де бермежекмен сени, деп,

Дадим, пакъыр, ушана эди савунда.

Юлдузумну юрюмеге къойман, деп,

Атып атам гюч-къуватлы сыртына,

Оьбе эди: къурчагъымны бермен, деп,

Яшыртгъынлап, атасындан тартына.

Меникисен, бермежекмен, бермей, деп,

Ана къоллар узун чачлар эше эди.

Къалмасын деп аявсуздан хатири

Гьарисине бир ярама тюше эди.

Гюл уямдан учгъандан сонг къуш йимик,

Гелин къыздай ай ярыкълы гечелер,

Биревге де бермежекмен сени, деп,

Жан сюйгеним шыбышлагъан нечелер.

Къалгъан заман: «бермеймен» деп, яш къоллар,

Минчакълардай тар бойнума тагъылып,

Гёзьяшларым тамагъыма тыгъылгъан,

Оьзлюгюнден гете эди агъылып.

Яшав бизин не янгъа да ташлагъан,

Аямагъан къысмат бизден къапасын.

Аз яшап да биз гёрмеген не къалгъан,

Танымайдан башлап яшым атасын.

Авуп гетме заман тезден болса да,

Сигьру сёзлер, не ерден де етежек,

Сув тамдырып, кёп керенлер тирилтген:

«Биревге де бермежекмен, бермежек...»

Дюньялар бир болуп къалса да...

Дюньялар бир болуп къалса да,

Ерлерде ер болмас – бир къылыкъ.

Къалгъан зат ёкъ болсун, къайырмас,

Бар болсун адамда адамлыкъ.

Гьей, инсан, ер кёкге айланып,

Тав авуп къалса да янынгда,

Намусунг тас этме, вёре, сен,

Адамлыкъ сакълансын санынгда.

Дослагъа кёмегинг тарыкъда,

Ятлардай ягъада токътама.

Етимни янында анангны

Татывлу ашларын макътама.

Ёкълукъну сёйлеме токъ булан,

Ач булан сёйлеме аш гьакъда.

Яш тапма болмайгъан къатынгъа

Вёре, сен сёйлеме яш гьакъда.

Пакъыргъа ёлугъув белгилеп,

Боюнгну алтынгъа бёлеме.

Авруйгъан адамны янында

Савлукъну гьакъында сёйлеме.

Гечген болма ярайсан

Сююв булан бирче тувгъан бир юлдуз,

Сюйгенлени ёлун ярыкъ этме деп,

Бизин учун яна эди аламда –

Арт бергенче бир-биревден гетме деп.

Сюювню биз аямагъан заманлар,

Рагьат этип ятбыз деген кёплени,

Юлдузубуз, къалгъан йимик хатири,

Тас бола эди денгизинде кёклени.

Англагъанча сюйген экев дюньяда

Бир-бирине айдай, гюндей тарыгъын,

Юз гече де къаравуллап аршланы

Дагъы гёрмес эдик ону ярыгъын.

Мен билемен, сагъынч къыйнап жанынгны,

Бу гёк гече сен де кёкге къарайсан.

Юлдузубуз ярыкъ бере янгыдан, –

Къарагъанда гечген болма ярайсан.

Сагъынып оьлежекмен

– Сенсиз бизге къоркъунч тюшлер

Гёрюне, – деп яшларым,

Айландырып битген тезден

Ястыкъгъа инбашларым.

Къол тербетме болмасам да

Тыгъыслыкъдан, тарлыкъдан,

Юхум къача сююнч артып

Бу байлыгъым барлыкъдан.

Заманда бир аякълары

Башлыгъымда болса да,

Тыгъыслыкъда эки гёзюм

Юху гёрмей къалса да...

«Насип сесни бёлмейик» – деп

Ай шыбышлап хоразгъа,

Танг къатмайлы, дюнья юхлап

Тургъай эди биразгъа.

Йыллар оьтер, заман етер –

Болуп оьзлер аналар,

Авлетлерин мендей бугюн

Къоркъунч тюшден аярлар.

Ялда къалгъан мен шо заман

Яллыкъны нетежекмен?

Шо гече мен бу гечемни

Сагъынып оьлежекмен.

Турмас эдинг гелмейли

Гел деп мени чакъырасан

Сагъынчымны артдырып,

Ойларымда тангларымны

Къучагъынгда къатдырып.

Оюм булан мен, озокъда,

Сен узатгъан къолдаман.

Гел деп гене чакъырасан,

Мен гелемен, ёлдаман.

Мен ёлдаман, амма ёлум

Элте йыракъ ярлагъа,

Сен ёкълукъдан санларымны

Уьшютеген къарлагъа.

Зар къышдан сонг гюл чечекли

Язбаш йимик етеген,

Болгъан буса бир ёл сама

Бир-биревге элтеген,

Минг ёллардан табуп шосун,

Талмакъ недир – билмейли,

Сен оьзюнг де булай узакъ

Турмас эдинг гелмейли.

Гёнгюн алма алгъасайыкъ

«Ана! Ана! Ана!» – деп биз тувгъанлы,

Бир де талмай алгъышлайбыз Ананы.

Гелигиз биз бугюн сама, бир сама,

Гёнгюн алма алгъасайыкъ Атаны.

Гелигиз биз барыбыз да бир болуп,

Аталагъа йылы сёзлер айтайыкъ.

Инбашына салып хыйлы юрюген

Олар булан шат яшлыкъгъа къайтайыкъ.

Къолгъа къалам алгъан гюнден бериге

Ана гьакъда кёп сатырлар язсакъ да,

Гьай аман, биз ювукъ гёрюп оьзлени

Аналагъа бираз артыкъ базсакъ да,

Аталардыр берекетге баш салар,

Ожакъланы тюп кюрчюсю олардыр.

Шо кюрчюсюн тас этген уьй даимге

Сувсуз къалгъан денгиз йимик боладыр.

«Ата!» – десенг къатты билек гёз алда,

«Ана!» – десенг исси экмек къолунгда.

Къатты билек булан исси экмегинг

Адашмагъа къоймас бир де ёлунгда.

«Ана! Ана! Ана!» – деп биз тувгъанлы,

Бир де талмай алгъышлайбыз Ананы.

Гелигиз биз бугюн сама, бир сама,

Гёнгюн алма алгъасайыкъ Атаны.

Хайырлы танглар ёрап,

Салам бердим къумукъгъа.

Рус тилде къайтды жавап,

Рус тил огъар ювукъгъа. ⠀

Къумукътюзюм, Къумукътюз,

Тарихлерде айтылгъан,

Тарихлерде оьр болуп,

Оьзден деген ат алгъан...

Айт, нелер болгъан сагъа,

Негер ошап къалгъансан?

Гюнсюз къалгъан гюз йимик

Саллангъансан, талгъансан.

Тайгъан сайын арадан

Тил билеген къартларынг,

Бара тура айланып

Шагьарлагъа юртларынг! ⠀

Сен инангъан, сен базгъан

Халкъ аздырып абурунг,

Тюшермикен гёрмеге

Бираз къалмай къабурунг. ⠀

Кёпден аз эте гьайынг,

Чыкъсын деп сен тёрюне.

Этгени – элекде сув

Элтегендей гёрюне...

Неге тюгюл юртларда

Салам берсенг къумукъгъа,

Рус тилде бере жавап –

Рус тил огъар ювукъгъа. ⠀

Насип недир?

Къалкъы тюгюл.

Борангъа да чыдажакъбыз,

Эгер къысмат, арив гёрюп,

Къалкъыбыз бузса.

Насип чи дюр

Юрек урса.

Анангдан да аз яша деп

Яшларыбыз оьгей ана

Къаргъамай буса...

Хоншу той

Уьч йыл алда гелешмиши гечинген

Хоншу къызны тою бола тангала.

Эсделиклер яшмын йимик ланс этип,

Яс янгыргъан йимик авул мунгайгъан.

Жыйып бирден булутларын тозулгъан,

Дертни сесин тез эшитип нече де,

Кёкюретип кёгюн, янгур себелеп,

Пашман кюйлер согъа бугюн гече де.

Мен анаман. Кёп йыл алда

Давгъа гетип бир яшы,

Бир гечеден бир эртенге

Ап-акъ болгъан кюр башы...

Шо гюн бугюн гюн арт берип,

Гюн гёрмеген анаман.

Амма бугюн гюнешден де

Артыкъ оьзюм янаман.

Огь, янаман. Къычыраман,

Насипли гюн етген деп.

Гёрегенлер, къайгъы оьтюп,

Тура башдан гетген деп.

Инаныгъыз, гетмегенмен,

Эпсиз айыкъ эсдемен.

Тек янаман бугюн, яна,

Дюньялыкъгъа есдемен.

Неге тюгюл, мен анаман,

Бир авлети – алгъан дав,

Бугюн эртен уьйге къайтгъан,

Бутсуз-къолсуз, амма... сав.

Бир яхшынга – минг яхшым,

Жаным савгъат, ал жаным.

Артынг берсенг – ари тур,

Гечмен, гессе де саным.

Булут артда ял тапгъан

Гюнеш де ярыкъ тюгюл.

Мен тарыкъ тюгюл адам,

Магъа да тарыкъ тюгюл.

Ессиз къалгъандай

Орамбашда сен гёрюнюп тюшюмде

Яна эди гёзлер, насип тапгъандай.

Тек мюгьлетден, урув токътап тёшюмде,

Умутумну къара булут япгъандай

Болуп бирден... гёзюм ачдым тюлюме.

Энни дюнья бюс-бютюнлей ялгъандай,

Гёз сугъара сёнюп битген гюлюмню,

Юрек буса йылай, ессиз къалгъандай.

Белгисиз тас…

Оьткюр юрек, таза юрек танг чыкъдай,

От-оьртенде бир сама да гюймеген,

Оьз гёнгюлден давгъа гетген

къоччакъдай...

Гьали тюгюл къашын булай тюймеген.

Оьз гёнгюлден сайлап сююв ялынын,

Таныгъынча ону несин-некенин,

Гьали тюгюл билмей болгъан оьзю де

Сюймек – янгыз сююнч тюгюл экенин.

Бугюн ахшам гёмюп ахыр умутун,

Жан шашытгъан оьткюрлюгюн аз этип,

Тёшню терен мююшюнде мунгайгъан,

Белгисиз тас сюювюне яс этип.

Болсун къатын ёрагъан

Жагьил улан уьйден чыгъып

Къайтмай тура бир гесек.

«Телефонгъа янгыз умут,

Гётермесми сёйлесек?»

Къайдагъы зат, о да бугюн

Къуллукъ кютме болмады.

Ана булан къатын ойгъа

Гелмеген не къалмады?

Къатын гьалек: «Айтаман чы

Кёпден тапгъан башгъасын,

Гьилла гёзлю, къуймур юзлю

Алтын чачлы къашгъасын…»

Ана буса яллай-гюе,

Шекленеген, билеген.

О пакъырны зар юрегин

Къоркъунч ойлар елеген:

«Яратгъаным менден алда

Сени алса оьзюне,

Огь, нечик багъарман, балам

Яшларынгны гёзюне?»

Къатын къоркъа, уьч яш булан

Эри къоюп гетерден,

Ана къоркъа, яшы оьлюп,

Къыяматгюн етерден.

Эки дертден эгер бирин

Тюшюп къалса сайлама,

Тюшмесин деп яслар тутуп

Къара явлукъ байлама –

Къой, бу гезик къатын озсун

Гёзю-къашы орайгъан:

Ана ойлайгъан болмасын,

Болсун къатын ёрайгъан.

Билседим

Ана болмакъ тиштайпаны

Савлугъун да ала дей:

Гьар авлети тувгъан сайын

Эси осал бола дей.

«Ою азгъан» кёп Аналар

Ёлдан нече къайтгъанлар

Унутмакъдан айтар сёзюн

Бир айтмай беш айтгъанлар.

Яшлар табуп, олардан да

Бетер гьалгъа етсем де,

Сёзюнг-оьзюнг унутма чы

Бажармадым нетсем де.

Эсделиклер – толгъан топдай

Денгизлерде батылмай.

Унутдурма болар йимик

Гючлер ерде сатылмай.

Ана болгъан юрегиме

Атынгны ят этердей,

Ёлукъсанг да ёлларымда,

Танымайлы оьтердей,

Эсделикни юлкъуп алып

Болар йимик ташлама,

Бир насипли сенсиз яшав

Болар йимик башлама…

Тюшде сама гёрюп гече,

Гертиликге гелседим –

Нече яшгъа ана болма

Герегимни билседим.

Къайда гетдинг

Сен янымда бар гюнлерде

Юрек гюлдей ачылып,

Гюл насибим тура эди,

Гюн шавладай чачылып.

Къышда очакъ ягъагъандай

Исси болма герекден,

Очакъ йимик иситеген

Йыр агъа эди юрекден.

Йыр язагъан кюйлени де

Унутагъан болгъанман.

Етим яшдай ёл бозарып,

Терезеде къалгъанман.

Йырларымны ушатгъанлар:

«Яз, яз», – дейлер, – дагъы да!»

Тынчмы язма къалгъан буса

Гюл умутунг ягъада?

Тынчмы язма, эсделиклер

Юрек ярар окъ буса,

Язгъанынгны охумагъа

Жан сюйгенинг ёкъ буса?

Язылмагъан йырым учун

Айыбынг кёп сени де –

Айт, аявлум, къайда гетдинг,

Шаир этип мени де?

Орамбашда сени гёзлей…

Орамбашда сени гёзлей

Эки якъны къаратсам да,

Сагъа элтер ёллар излей

Сан-санымны къаралтсам да,

Тегенекли тёбелерден

Яланаякъ айлансам да,

Оьтюп сувдан, отдан, елден,

Шынжырлагъа байлансам да,

Къутгъармагъа сен гелер деп

Умут этип йиберсем де,

Сени излеп, сени гёзлеп,

Гёзюм ачып жан берсем де,

Янгызлыкъда ташламайлы

Яныма бир гелмежексен,

Менсиз гюнню гётермейли,

Артым булан оьлмежексен,

Оьлмежексен, билемен.

Гертилиги аз дюньядан

Сююв оьтюп гетген жан деп,

Юрегинде сени булан

Ахыратгъа етген жан деп,

Оьмюр бою эсделикни

Оьзюнг булан элтмежексен,

Языкъсынып, къабурума

Бир сама да гелмежексен,

Гелмежексен, билемен.

Пашман болма

Пашман болма, пашман болма, азизим,

Мен бар чакъы къайгъынг эки бёлмеге.

Тюллерингде болмасам да, азизим,

Мен бар чакъы тюшлеринге гелмеге.

Гьасиретликден бир бакъмагъа гёзюнге,

Мен бар чакъы къуруп битип барагъан.

Ерлердеги инг де таза сюювюм

Мен бар чакъы янгыз сагъа ёрагъан.

Вёре, бир де пашман болма, аявлум,

Ерде къайгъы къопмажакъны билемен –

Аллагьымдан гьар намазны артындан

Мен бар чакъы сагъа алгъыш тилеме.

Ёрамасын

Аврув ятгъан кепсиз, кюйсюз, саламсыз,

Не ой гелмей бугюн тилсиз юрекге.

Бек алгъасап оьлме сюймей, амалсыз,

Жагьиллени тою болма герекге.

Дос-къардаш да огъар арив къарайлар:

Ай гетмейли тойну гюню етежек.

Тамазагъа узакъ оьмюр ёрайлар,

Оьлюп къалса, тойгъа пуршав этежек.

Юрек къысып, гёзню яшдан толтуруп,

Масъаланы терени бар ой учун.

Дос-къардашым башлыгъымда олтуруп,

Магъа оьмюр ёрамасын той учун.

Стихи.docx(31,0 КБ)

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

168