Меню
16+

Сетевое издание «Будни района»

02.10.2020 10:15 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Къастлы етер муратгъа

Автор: Р.Мусаева

Бизин яшавубузда бары да касбуланы ва къуллукъланы гьарисини ­оьзюне хас агьамияты бар. Докторлар адамны сав эте буса, муаллимлер охувчулагъа билим бере, тарбиялай.

Бизин районда сынавлу муаллимлерден уьлгю алып, олардан артда къалмасбыз деп гьаракат этип ишлейген жагьил муаллимлер аз тюгюл.

Шолай муаллимлерден бириси – Бийболатова Зумарият Абдуллагьатовна. Ол Къарабудагъгент гимназияда биология дарсны муаллими болуп ишлей.

З.Бийболатова 1988-нчи йылда Къарабудагъгент юртда тувгъан. Къарабудагъгент гимназияны битдирген сонг, гиччиден берли танглагъан касбусуну сырларына тюшюнмек учун, Дагъыстан Пачалыкъ университетге тюшген. Оьр билим алып къайтгъан сонг, ол 2011-нчи йылда гимназияда иш башлагъан. Гюнден-гюн билимин, сынавун артдыра туруп, жагьил муаллим бугюнге ерли оьзюню ишинде гёрмекли натижалагъа етишген.

З. Бийболатова оьтгереген ачыкъ дарсларда ортакъчылыкъ этген башгъа муаллимлер оьзлени ишинде къолламакъ учун кёп пайдалы къайдаланы гёре ва оланы къоллай. З. Бийболатова – билим берив тармакъда арагъа чыгъагъан бары да янгылыкъланы уста кюйде гьар дарсында дегенлей къоллап турагъан муаллим.

Шо саялы да З. Бийболатова дарс береген охувчулар гьар йыл биологиядан ва экологиядан район оьлчевде оьтгерилеген олимпиадаларда ортакъчылыкъ этип, алдынлы ерлер алма бажара. Зумарият Бийболатова оьзюню дарсындан яшланы янгыз билимин артдырып къоймай, ол билим беривню гьар тюрлю тармакъларына оьзю де машгъул бола, охувчуланы да гьаваслыгъын артдыра. Шо саялы да муаллимни ёлбашчылыгъы булан, охувчулар илму-ахтарыв ёлунда биринчи абатларын эте. Район ва республика оьлчевде оьтгерилеген ярышларда З.Бийболатова гьазирлеген охувчулар алдынлы ерлер къазанма бажаргъан. Оьтген охув йылдагъы гьаракатыны гьасиллерине гёре, салынгъан сынавлардан оьтюп, жагьил муаллим оьр даражалы муаллим деген атгъа ес болду.

Оьзюню билимин камиллешдирмек, сынавун аян этмек муратда З.Бийболатова касбу ярышларда да ортакъчылыкъ эте. 2019-2020-нчы йылда оьтгерилген «Инг яхшы клас ёлбашчысы» деген район ярышда муаллим Зумарият Бийболатова алдынлыланы сыдрасына гирди. Зумарият Абдуллагьатовна ёлбашчылыкъ этген 11-нчи химико- биология клас охувун битдирип, бары да оьр охув ожакълагъа тюшюп охувун давам эте.

Къумукъ халкъыбызны сёз хазнасында «Къастлы етер муратгъа» деген айтыв бар. Шо айтыв толу кюйде бажарывлу муаллим, гьайлы тарбиялавчу Бийболатова Зумарият Абдуллагьатовнагъа гелише деп айтма ярай.

Жагьил буса да бажарывлу муаллимге ишинде гележекде де уллу уьстюнлюклер, къатты савлукъ ёрайбыз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

8