Касбусуну устасы
Муаллим деген сёзню кёбюсю пачалыкъларда уллу гьарп булан яза.
Бизин яшавубузну кёп яны муаллимлени къырыйында оьте десек, ялгъан болмас.
Яшгъа 7 йыл битгени булан ва 17 йыл битгинче, ону яшаву школа ва муаллимлер булан байлавлу бола.
Шо саялы да муаллим касбуну айыргъан адам яшланы сюймеге ва англама герек, чыдамлы болмагъа тарыкъ деп эсиме геле.
Шолай муаллимлени алдында билим алма гелеген яшлар оьзлени яшлары йимик болуп къала.
Муаллимлер охувчу яшлагъа школада дарслар береген къайры, оланы ва тарбиясыны уьстюнде гьар гюн ишлей.
Манасгент орта школада кёп гьаракатчы, сынавлу ва оьзлени касбусуна берилип ишлейген муаллимлер бар. Олар гьариси оьзлер береген предметлерден айтылгъан касбучулар.
Шолай, школада айтылгъан муаллимлени арасында Гьасанова Сапият Нажиюллаевна да бар.
Ол Дагъыстан пачалыкъ педагогика университетни яхшы къыйматлар булан охуп битдирген сонг, 1982-нчи йылда оьзюню юртундагъы школагъа рус тилден ва адабиятдан муаллим болуп ишлемеге тюше.
Оьз касбусуну устасы Сапият Гьасанова оьзюню ишин бек билеген касбучу, яшланы англайгъан ва сюеген яхшы якъдан ва муаллим гьисапда гёрсетме бажаргъан. Оьзюню дарсларын Сапият Гьасанова къужурлу, яшлар англайгъан кюйде оьтгермеге гьаракат эте.
Охувчу яшлагъа дарсланы ичинде ол тюрлю-тюрлю янгы методика къайдаланы къоллай, оьтгерилеген дарслар рагьат болсун учун гьайын эте.
Сапият Нажмутдиновна школада кёп йыллар къайратлы загьмат тёкген саялы республика, район администрация, билим берив управление ва школаны янындан кёп керенлер Гьюрметлев грамоталар ва дипломлары булан савгъатлангъан. Ол охутагъан яшлар кёп тюрлю республика ва район олимпиадаларда ортакъчылыкъ этип, алдынлы ерлени къазангъан.
«Сапият Нажиюллаевна булан сёйлемеге бек рагьат» — дей ону гьакъында иш ёлдашлары.
Ону алдында билим алгъан яшлар оьр охув ожакъланы битдирип тюрлю-тюрлю касбуланы башын тутуп ишлей, гьариси яшавда оьр ерлерин тапгъан. Биз ону ва бары да муаллимлени гележек байрам булан къутлай туруп, къатты савлукъ, узакъ оьмюр ва иш ёлунда дагъы да кёп тюрлю уьстюнлюклер ёрамагъа сюебиз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
