Ёллар къурула ва онгарыла

- Вагьапгьажи Абдуллаевич, сизин оьзюгюзню ва коллективигизни етишип гелеген хас касбу байрамыгъыз булан къутлай ва яхшылыкълар ёрай туруп, ишчилеригизни ва хас техникагъызны, этилинип турагъан ишлеригизни гьакъында баянлыкълар бергенигизни сюер эдик.

- Къутлавугъузгъа ва ёравларыгъызгъа баракалла. «Карабудахкентское ДЭП-17» ОАО-гъа ёлбашчылыкъ этегеним 30 йыллар бола. Шо заманны ичинде райондагъы бары да юртланы ёлларын ва орамларын онгарып, янгыртып, бир-бир орамлагъа асфальт салгъанбыз.

Бугюн-буссагьат коллективде 48 адам загьмат тёге. Оланы арасында шофёрлар, ишчилер, загьматны усталары бар. Олай да, 4 Камаз машинибиз, погрузчик, асфальтны ёлгъа яягъан хас машин ва оьзге шолай тарыкълы техникабыз бар.

- Сиз ёлбашчылыкъ этеген идара республиканы даражасында оьт­герилеген хас программаларда ва проектлерде ортакъчылыкъ болдурамы? Не йимик ишлер этесиз?

- Гертилей де, республиканы оьлчевюнде юрюлеген «Мой Дагестан – мои дороги», «Муниципал ёл фонд» деген проектлерде ва «Дагавтодор» ГКУ-ну программасында бизин идара иш гёре.

Демек, шо къурумлар оьтгереген аукционланы барышында биз ортакъчылыкъ этебиз, контрактланы утабыз ва шолагъа гёре борчубузну кютебиз.

- Вагьапгьажи Абдуллаевич, шо ишлер гьакъда баянлыкълар берсегиз.

- Берейим. Масала, «Мой Дагестан – мои дороги» деген проектге гёре, 15 къурулушну (объектни) аукционларын утгъанбыз ва шолагъа гёре иш юрютюп турабыз.

Ачыкълашдырып айтайым, Къарабудагъгентде Гь.Абдуллаевни атындагъы орамгъа 1200 метр узунлугъу булан асфальт салдыкъ. Контрактны оьлчевю – 5 миллион 300 минг манат.

Дёргели юртда Садовая орамгъа 1 миллион 800 минг манатны къадарына асфальт салдыкъ. Олай да, Къурбукидеги Школьная ва Садовая орамларда 3 миллион 300 минг манатны оьлчевюнде иш этдик.

«Муниципал ёл фонд» проектлеге гёре, 9 объектни ишин юрютюп турабыз. Демек, Къарабудагъгент, Гьели, Манасгент юртларда орамланы, адамлар юрюйген тротуарланы ­онгарабыз ва оьзге ишлерин юрютебиз.

«Дагавтодор» ГКУ-ну янындан да бизин идарабыз бу йыл 100 миллион манатны къадарында аукционлар утгъан. Масала, Къарабудагъгент- Къакъашура ёлну 5 чакъырымына асфальт салынды. Губденден Сергокъалагъа барагъан ёлну 6 чакъырымына да асфальт салдыкъ.

Сонг да, Къарабудагъгентни «Къозбав» микрорайонунда 3 чакъырым узунлугъу булан орамланы асфальт этмеге гёз алгъа тутгъанбыз.

- Гюз орталап тура. Узакъ къалмайлы къыш да гележек. Гьазирлигигиз нечикдир?

- Гертилей де, «Карабудахкентское ДЭП-17» ОАО гьар йыл къышгъа гьазирлик гёребиз. Шо вакътиге тарыкълы хас техникабыз ремонт этилип тура, къайырны (песокну), тарыкълы болса, алып ёллагъа тёкмеге гёз алгъа тутгъанбыз, ташып гьазирлегенбиз.

Озокъда, ёлланы ва орамланы ремонт ишлерин даим кютюп турабыз, ёл ягъадагъы нас-алагъожаланы тазалайбыз, ёллагъа хас белгилени къурашдырабыз ва салабыз.

-Вагьапгьажи Абдуллаевич, ишчилеригизни алапалары не къадардадыр? Оланы иштагьландырмакъ учун не йимик чаралар гёрюле?

- Бу соравлагъа жавап бере туруп, савлай дюньягъа белгили адам Генри Фордну гьакъыллы сёзлерин айтма сюемен. Ол булай айтгъан: «Ишлейген адамны иштагьландырмакъ учун огъар тийишли даражада алапа бермеге герек!”.

Сонг да, бизин абурлу ва сынавлу тамазабыз Насрутдин Насрутдинов да оьзюню сёйлевюнде ишчи ­халкъны гёнгюн алып ва разилигин къазанып ишлемеге гьаманда чакъыра. Мен де оьз ишимни шолай салгъанман.

Демек, буссагьат асфальт яйывчулар 30 минг манат алапа ала, механизаторлар, ишни усталары – 40 минг манатдан аз алмай. Олай да, бизин касбу байрамыбызгъа гьарисине 20 минг манатны оьлчевюнде премия акъчалар бердик. Йылны гьар кварталында да шолай ругьландырмакъ муратда акъчалар бериле.

- Ишде уьлгюлю ишлейген бир-эки адамны эсгерсегиз.

- Эсгерейим, асфальт яйывчулар: Магьамматсалам Тавлуев, Магьамматрасул Гьасанов, Нюрмагьаммат Къаранаев, Завур Минатуллаев; шофёрлар: Муратбек Алиев, Абакар Паталиев, Гьайбулла Агъаев. Олай да, сваршик Лабазан Ражабов, уста (мастер) Макъсум Айгумов ва баш инженер Болат Муташев шолай ёлдашлардан санала.

- Районну башчысы Магьмут Амиралиев транспорт налогну жыйывуна аслу тергев бере. Демек, транспорт налог барысы да оьз къадары булан гьар районгъа ва гьар юртгъа йиберилегенни кёп эсгере. Шо гьакъда не баянлыкълар бермеге боласыз.

- Гертилей де, жыйылгъан транспорт налог барысы да юртлагъа йибериле ва шогъар гёре юртларда ишлер юрюле. Ёлланы онгарыв ва янгыртыв шо налогну жыйылывундан гьасил бола. Айтагъаным, машини бар адам оьзю тёлеген налоггъа ёллар онгарылагъанны билмеге герек. Шо саялы да, мен де транспорт налогну заманында тёлемеге чакъыраман.

Бугюн, байрамыбызны алдында газетден сёйлейгенимден пайдаланып, бары да ёл къуллукъчуланы, айрокъда иш ёлдашларыбызны байрамы булан къутлай туруп, агьлюлеринде токълукъ, къаркъараларына савлукъ, яшавунда буса арты битмейген насип ёрайман.