Ёл къурувчулагъа баракалла

Гетген асруну 60-нчы йылларыны ахырында асфальт этилген Къакъашура юртгъа барагъан ёлну да кёп тетиклери ёкъ тюгюл эди. Районну ёл управлениесини къуллукъчулары шо ёлдагъы къуюланы, чонкъланы аз онгармагъан, тек янгурлар, машинлени юрюшю ёлну тез буза эди.

Маълумат къуралларда налог­ланы, айрокъда транспорт налогну гьакъында кёп языла. Алда да транспорту бар адам налогун тёлемей къоймай болгъандыр. Тек ватандашлар жыйылгъан транспорт налог къайда гетегенин, не муратгъа харжланагъанын билмей эди. Республикагъа Владимир Васильев Башчы болуп гелгенде, район жыйгъан транспорт налог районгъа къайтып гелеген болду. Районну гьакимлери шо харжланы къайсы юрт нечакъы транспорт налог жыйгъан шо къадар акъча къошуму да булан юртгъа геле. Шо нечакъы да яхшы, тюз.

Мен айтма сюеген зат, 2020-нчы йылда районда юртланы орамларын онгарывда кёп иш этиле. Ёлланы, орамланы онгарывда районну ёл эксплуатация управлениесини коллективини гьаракаты макътавгъа лайыкълы. Шо къурумну касбучуларыны, къуллукъчуларыны гьаракаты булан Къакъашура, Къакъамахи юртлагъа барагъан ёлну 5 километр мезгилин мукъуятлы кюйде асфальт салып онгарды. Гьали ёлда машинни юрюйгени билинмей, ари-бери барагъанда къавшалмайсан. Къакъамахи юртну ватандашлары районну ёл эксплуатация управлениесини къуллукъчуларына баракалла билдирелер.

18-нчи октябр – Ёл хозяйствону къуллукъчуларыны касбу байрамы. Мен районну ёл эксплуатация управлениесини ёлбашчысы Вагьап­гьажи Алиевни, асфальт яйывчулар: Нюрмагьаммат Къаранаевни, Магьамматсалам Тавлуевни, Магьамматрасул Гьасановну ва мен атларын эсгермеген коллективни оьзге уьюрлерин касбу байрамы булан гьакъ юрекден къутлама сюемен. Этеген пайдалы ишигиз саялы, сизге баракалла.