Къурулушланы барышына къаралды
Бизин газетни гьамангъы охувчулары уьйренип де къалгъандыр, жуманы башында, ташдырып айтгъанда, гьар талатгюн район администрацияда гезикли генгеш оьтгериле.
Бизин районда артдагъы вакътилерде гьар тюрлю федерал, республика ва ерли программалар булан кёп ишлер этилип тура. Оланы кёплери йылны ахырына пайдаландырывгъа берилме тарыкъ.
Районну башчысы М. Амиралиев районну территориясында тюрлю-тюрлю программалагъа гёре этилип турагъан ишлени барышы гьакъда мекенли, мукъаятлы кюйде, къысгъартып маълумат берме районну яшавлукъ, коммунал хозяйствосуну ва капитал къурулуш управлениесини начальнигини орунбасары Магьаммат Абусайитовну сагьнагъа чакъырды.
Ол 2020-нчы йылда юртланы халкъларын ичеген таза сув булан таъмин этивде, савлукъ сакълав, билим берив тармакъларда, ватандашланы ял алыв шартларын къолайлашдырывда, транспорт юрюйген ёлланы сан янын яхшылашдырывда этилеген ишлени анализ этип сёйледи.
-«Мени Дагъыстаным – таза сув» деген программа булан Губден, Къурбуки юртланы ватандашларын «Хала-Горк» деген сув кёлден 12,5 км мезгилге сув тартыв иш узатыла. Проектни багьасы – 134 миллион манат. «Абукъ» деген фирманы къуллукъчулары 100719 минг манатны ишин этген. Ишлени барышы гюн сайын чалтлаша. Къурулуш бу йылны ахырына пайдаландырывгъа берилме тарыкъ.
Дёргели юртда Дагъыстан республиканы савлукъ сакълав министерлигинден линиясындан таба 10 койкагъа ери булангъы больница къурулгъан. Больницаны тарыкълы алатлар булан таъмин этив ишлери къалгъан. Шо ишлери де юрюле. Гёрсетилген 78 миллион манатдан къолай акъча бар.
«Комфортная городская среда» деген программа булан Губден, Къурбуки, Жанга юртларда умуми 13661 минг манат къадары булангъы 3 объект пайдаландырывгъа берив даражасында.
«Мени Дагъыстаным – мени ёлларым» деген программа булан 29,9 миллион манат гёрсетилген, гьалиге 14805 минг манатны иши этилип тура.
Муниципал ёл фонддан таба 27,9 миллион акъча гёрсетилген, этилип турагъан ишлер аз тюгюл.
Бизин районда Россия Федерацияны якълав министерлигинден таба Къарабудагъгент юртда 250 яшгъа, Дёргели юртда 200 яшгъа, Жанга юртда 120 яшгъа ери булангъы яшлар бавлары къурулуп тура. Къурулушланы умуми багьасы – 460 миллион манат.
Артдагъы йылларда районну маданият тармагъына тергев гючленгени де сююндюрмей болмай. Ерлердеги маданият къалалагъа ремонтлар этиле. Масала, буссагьатгъы вакътиде ДР-ни маданият министерлигинден таба Дёргели, Къакъашура, Къурбуки юртлардагъы маданият уьйлеге капитал ремонт этилип тура. Шо муратлагъа умуми алгъанда 25846 минг манат акъча гёрсетилген.
2020-нчы йылда «100 школа» деген проектде бизин районну 8 школасы ортакъчылыкъ эте. Тарыкъ кагъызлар заманында онгарылгъан. Меценат кёмекни гьисапгъа алмагъанда, буссагьатгъы вакътиде 6 школада программада гёрсетилген ишлер этилип битген,–деди докладчы.
Чараны жамын чыгъарып сёйлей туруп, районну башчысы М.Амиралиев йыл тамамланма аз заман къалгъан вакъти рагьатланма чола ёгъун, бу йыл пайдаландырывгъа берилме герекли объектлер дыгъарда гёрсетилген болжалда пайдаландырывгъа берилме герегин жаваплы ёлдашланы бирдагъы керен эсине салды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
