Яхшы ишлегенлер эсгерилди...

Магьмут Гьюсейнович чарада аслу масъалалагъа гёчгюнче, залдагъылагъа республиканы Башчысы Владимир Васильевни налогланы толу жыйылывун болдурмакъ муратда берген тапшурувларын, налогланы жыйылывуну толувун малим этди. М.Амиралиев район бары да налогланы жыйыв планын хыйлы артыкъ этип толтургъанын иштагьлы кюйде эсгерди.

Топуракъ, мал-матагь налогланы жыйывда ишине жаваплы янашгъан юртланы башчыларыны атына лайыкъ­лы сёзлер айтды.

Налогланы жыйывда Уллубийавул планны 177 процентге, Паравул – 173 процентге, Манасгент –139 процентге, Къарабудагъгент – 114 процентге толтургъан.

Чараны узата туруп, районну башчысы бу йыл «Местные инициативы» программада район 5 программада, юртлар 2-3 программада ортакъчылыкъ этежегин ачыкълашдырды. «Местные инициативы» программада ортакъчылыкъ­ этмек учун тарыкълы кагъызлар март айны 1-ине ерли къабул этилежегин айтды. Шо саялы юртланы башчыларына тийишли къуллукълагъа чалтлыкъда кагъызланы гьазирлеме тапшурувлар берилди.

Чарада районну ветеринар управлениесини къуллукъчулары гьайванланы арасында инфекция аврувланы алдын алывда этген ишлер, шо аврувланы яйылывну алдын алмакъ учун гёрюлеген чаралар арагъа салынып къаралды. Бу масъалагъа байлавлу районну ветеринар управлениесини касбучусу А.Гьюсенов чыгъып сёйледи.

Ол оьзюню сёйлевюн районда гьайванланы арасында югъагъан инфекция аврувланы алдын алывда районну ветеринар управлениесини касбучулары оьтгерген, оьтгерип турагъан ишлени гьакъында маълумат берди.

Районда гетген йыл бурцелезгъа 10 минг гьайванны тергеме тарыкъ эдик. 15 минг гьайван тергевден чыкъгъан. Натижада 74 гьайван бруцеллёз, 94 гьайван лейкоз аврувдан авруйгъаны ачыкъ болгъан. Чарада сёйлеген касбучуну баянлыгъына гёре, бары да авруйгъан гьайванлар ветеринар закон талап этеген кюйде тайдырылгъан.

Чарада районну ичинде авруйгъан гьайванланы яллатма, гёмме хас ерлер (скотомогильник) ёкъ. Барлары да зооветеринар талаплагъа жавап бермей.

Районда гьайванланы арасында югъагъан аврувланы яйылывуна Манас ярмакюге гелтирип сатагъан гьайванлар да болушлукъ эте. Ветеринар управлениени къуллукъчуларыны янындан гёрюлеген чаралар тийишли натижа бермей.

Шо гюн оьтгерилген чарада районну территориясында хас гьайван-мал, тавукъ соягъан ерлер ёкъ экени гьакъда да айтылды. Районну башчысы бу ва оьз­ге масъалаланы чече туруп, Аччысув зонада гьайван-мал, Къакъашура – Дёргели зонада тавукълар соягъан хас ерлер ачма гёз алгъа тутулгъанын эсгерди. Ондан къайры да районда бир хас “скотомогильник” къурма-ачма бойнуна алды.

Барыбызгъа да белгили кюйде, бу йылны октябр айында уьлкеде адамны гьисабын алыв чара оьтгерилежек. Бу – уьлкени яшавунда агьамиятлы чара.

Районда адамланы гьисабын алыв ишге нечик гьазирлик гёрюлегени гьакъда районну ЦСУ-ну ёлбашчысы Нажмугьуда Гьасанов маълумат берди. Ону сёйлевюнде ачыкъ болгъаны йимик, районда буссагьатгъы вакъти 10 минг яшавлукъ уьйлер, районда 88 минг адам яшай. Халкъланы гьисабын алыв ишге жаваплы янашма тарыкъ. Н.Гьасанов алда адамланы гьисабы кагъызгъа язылып юрюлегенни хата болса, алмашынывлар этме болагъанны айтды. Гьали адамланы гьисабы планшетлеге алынажакъ, хаталаны тюзлеме къыйын болажакъ. Бирдагъы-бир зат: бу йылны ичинде юртланы орамларын алышдырма ярамай. Шо саялы ерлерде адамланы гьисабын алывда къуршалажакъ адамлар, жавапчылыкъны гьис этеген ёлдашлар болма тарыкъ.

Адамланы гьисабын алыв ишни оьр даражада оьтгермек учун районну башчысы шо ишге къуршалажакъ ёлдашлар булан семинар ­оьтгерме тапшурув берди.

Чараны ахырында райцентрда адамланы ичеген сув булан таъмин этивде, быргъыланы къурашдырывда намуслу кюйде загьмат тёкген ёлдашланы бир бёлюгюне районну «Гьюрметлев грамоталары» тапшурулду.

Савгъатланы районну башчысы Магьмут Амиралиев тапшурду.