Къарабудагъгент – районну бети

Гетген йыл Къарабудагъгентде «Мени Дагъыстаным – мени ёлларым», «Мени Дагъыстаным – таза сув», 150 школа» , «Точка роста» ва оьзге программалагъа къошулуп райцентрда этилген ишлени гьакъында районну башчысыны биринчи орунбасары Агьмат Гьажиев юртлулагъа мекенли маълуматлар берди.

Агьмат Гьажиев залдагъылар булан саламлашып, сорашып битген сонг, оьзюню сёйлевюн юртубузну зорлугъундан, гёзеллигинден башлады. Къарабудагъгент юртда буссагьатгъы вакъти 18 мингден де къолай адам яшай. Шо – районда яшайгъан адамланы санавуну 20 процентден де къолайы.

Юртубузну бир башындан бириси башына ерли 12 чакъырым (км) бар. Юртда 60-дан къолай федерал, республика, ерли агьамияты булангъы идаралар, къурумлар ишлей.

Райцентрда ерлешген идаралагъа: пенсионный фонд, МФЦ, газгъа, судгъа, прокуратурагъа ва оьзгелерине къуллукълары болуп кёп халкъ геле. Къарабудагъгент – районубузну бети.

Юртда халкъланы гьар гюнлюк талапларын кютме 97 тюкен, 16 машинлер жувагъан ер, 9 аптек, 7 автозаправка ишлей.

Яшларыбызгъа билим-тарбия береген 5 школа бар, оланы бири – гимназия. 3140 яш школагъа бара, олагъа билим беривде 503 муаллим загьмат тёге. Райцентрда 8 яшлар баву иш гёре. 4-юсю пачалыкъ оьз еслик аралыкълар булан ишлей. Яшлар бавунда 1247 яш сакълана ва тарбиялана. Оланы тарбиялавда 250 тарбиялавчу чалыша.

Агьмат Гьажиев оьзюню сёйлевюн узата туруп, 2019-нчу йылда «Мени Дагъыстаным – мени ёлларым» деген программа булан райцентрдагъы У.Буйнакскийни атындагъы орамгъа сылама тутулгъан, эки ягъасында адамлагъа юрюме тротуар этилген. «Комфортная городская среда» деген программа булан Къарабудагъгент юртда скверлер, гиччипавлагъа, уллулагъа ял алагъан ерлер онгарылып пайдаландырывгъа берилген.

Райцентрны «Пост ГАИ» микрорайонунда Гь.Гьамзатовну атындагъы яшлар, уллулар учун этилген парк ва оьзгелери гёзелликге гёзеллик къоша.

«Мени Дагъыстаным – таза сув» деген программа булан «Бекенез» булакъны сувун юртгъа етишдирмек учун эсги болгъан быргъыланы алышдырывда хыйлы иш этилген.

Агьмат Гьажиев гетген йыл райцентрда этилген ишлер къайсыбызны да сююндюре, тек 2020-нчы йылда юртда дагъы да кёп иш этме гёз алгъа тутулгъанын ташдырды. Агьмат Гьажиев 2020-нчы йылда райцентрда этме гёз алгъа тутугъан бир нече объектни атларын эсгерди. Олар: Корага-бавда 5-нчи школаны къурулушу, яшлар табагъан уьй, Пост ГАИ-ден юртгъа гиреген орамгъа сылама салыв ва оьзге ишлер…

Агьмат Гьажиевни сёйлевюнден сонг, сагьнагъа районну башчысы Магьмут Амиралиев гётерилди. Ол залдагъылар булан исси саламлашып битген сонг, бугюн сизин булан ёлукъма сюегеним, гележекде юртда не йимик ишлеге тергев берсек, къайсы ишни биринчилей башласакъ, яхшы болажагъы, сизин пикирлеригизни билме сююп жыйыл­гъанбыз.

Гетген йыл юртда не йимик ишлер этилген, этме гёз алгъа тутулгъанын Агьмат Абдулмежитович айтып гетди, такрарлама сюймеймен. Бир затны эсгерейим: гетген йыл районгъа 8 янгы автотранспорт гелди. Шоланы 4-ю федерал программа булан, 4-ю республика программа булан. Район налогланы жыйывда планланы артыкълыгъы булан толтургъаныбыз саялы В.Васильевни районгъа савгъаты.

Районну башчысы оьзюню сёйлевюнде налогланы жыйывгъа, айрокъда транспорт налогну жыйывгъа айрыча агьамият бакъдырды.

М.Амиралиев бары да жыйылгъан налоглар коэфициент де къошулуп районгъа гелегенин аян этди. Мен юртланы башчылары жыйгъан транспорт налогуна гёре акъча бережекмен. Шо харжланы юртну тарыгъына харжлама, ишлер этме бола.

М.Амиралиев 2019-нчу йылда этген ишлени барын да такрарламай, район пляжда этилген ишлени, гёз алгъа тутгъан планланы суратлады.

- 2020-нчы йылда гьар тюрлю программалар булан ерлерде, районну ичинде кёп иш этме къаст бар. Шо ишлени авадан яны райцентрда этилежек,-деди районну башчысы М.Амиралиев.

Къарабудагъгент юртну жамияты районну башчысы булангъы ёлугъувунда кёп тюрлю соравлар берди ва масъалаланы гётердилер.

Масала, чыгъып сёйлеген далапчы Нюрислам Сайитов бизин республикада уллу машинлеге транспорт налог гётергени саялы фураланы есилери хоншу Чечен, Ингушетия республикаларда учётда. Шо регионда учётда токътагъан бизин райондан да кёп машин бар. Гьали республикада машинни моторуну гючюне, бир ат гючге – 50 манат. Шо санавну 30 манат этсе, хыйлы гьайдавчу ерлерде учётда токътажакъ эди.

Ёлугъувда юрт хозяйство производствону гётеривге, орамланы тазалыгъын болдурувгъа, оьзге масъалалагъа байлавлу соравлар берилди, берилген соравланы кёплери гьисапгъа алынды.

Ёлугъувда юртну имамы Халитгьажи Бабатов чыгъып сёйледи. Ол оьзюню сёйлевюнде юртну ичинде кальян тартагъан, эсиртеген ичкилер сатагъан ерлер барын, оланы закон ёлунда тайдырма, алдын алма таклиф этди. Ондан къайры да Халитгьажини къурумланы ёлбашчыларын халкъланы къуллукъларын кютювге жаваплы янашма чакъырды. Сёзюн узата туруп, Халитгьажи Бабатов къарабудагъгентлилени хазна байлыгъы Герей –тюзню топуракъларын сатма ярамайгъанын ташдырды. Топуракъ – жамиятны байлыгъы. Бугюн топуракъ халкъгъа пайланып топуракъны ишлетсин, яшав даражасын яхшылашдырсын деп берилген. Топуракъ – наслудан-наслугъа къалагъан ниъмат.

Жыйынны ахырында юртну башчысы Магьамматсолтан Гьасанов райцентрны гёзеллигин болдурувда, сув масъаланы чечивде, оьзге объектлени къурувда яллыкъ тапмай айланагъан районну башчысына юртлуланы атындан разилигин билдирди. Магьамматсолтан Гьасанов юртну ичинде бар масъалаланы чечивде оьзюню къабургъасына тюшюп ишлеген иш ёлдашларыны, юрт советни депутатларыны атына лайыкъ­лы сёзлер айтды.