«Инсан» Къарабудагъгентде

Шо гюнгю ёлугъувгъа Центрда яшларыны савлугъун камиллешдирип юрюйген кёп аналар яшлары да булан жыйылгъан эдилер. Центрны ёлбашчысы Ака Исрапилов гелген къонакълар булан жыйылгъанланы ювукъдан таныш этген сонг, олар не мурат булан гелгенин де айтып жыйылгъан ёлдашлагъа англатды. Эсгерилген фондну бизин районгъа къарайгъан бёлюгюню ёлбашчысы Магьамматдагьир Абусаламов да оьзюню сёйлевюнде оьзлени рагьмулу ишлери гьакъда айта туруп, республиканы гьар тюрлю ерлеринде яшавлукъ этеген, олай да шулай центрларда, хас школаларда, больницаларда савлугъун камиллешдирип юрюйген сакъат, яшавлугъу осал яшлагъа фондну янындан этилинеген рагьмулу кёмеклени гьакъында айтып эсгерди. Сонг рагьмулу фондну уьюрлери Къарабудагъгентдеги реабилитация Центрына савлугъун камиллешдирмек учун къуршалагъан яшланы ойларын, муратларын, не затдан тарчыкълыкъда экенин билмек учун бары да яшлагъа, яшлары язып болмайгъанларыны аналарына ручкалар, кагъызлар бердилер. Оьзлеге тарыкъ — герекни язгъан сонг, яшлар, бирлерини аналары шо язывлар этген кагъызларын, атын, фамилиясын да язып эсгерилген фондну “Шкатулка желаний” деген хас яшигине салдылар. Фондну къуллукъчулары буса, шо яшикдеги яшлар язып салгъан кагъызланы гёзден гечирип, яшланы талапларын яшавгъа чыгъаражакъгъа сёз бердилер. Реабилитация центрда шо гюн болгъан ёлугъувда район администрацияны социал-сиясат бёлюгюню ёлбашчысы Гюлжанат Темирова да ортакъчылыкъ этди, ол сакъат яшланы гьайында къалып, олагъа кёмек къолун узатагъан, рагьмулу фондну ёлбашчыларына ва уьюрлерине баракалласын билдирди.