Харжлар гёрсетиле
Январ айны 22-нде район администрацияны жыйынлар оьтгерилеген залында генгеш оьтгерилди. Генгешде районну башчысы Магьмут Амиралиев, ону орунбасары Агьмат Гьажиев, билим берив управлениени ёлбашчысы Тажли Хизриева, районну школаларыны ёлбашчылары ортакъчылыгъын болдурду.
Генгешни ачгъан ва юрютген районну башчысы Магьмут Амиралиев трибунагъа маълуматлар бермек учун оьзюню орунбасары Агьмат Гьажиевни чакъырды. Генгешни юрюшюнде сёйлеген Агьмат Гьажиев бу йылда бизин районну школалары «150 школа» деген федерал программада ортакъчылыкъ этежегин жыйылгъанлагъа малим этди. Бары да халкъ билеген кюйде, гетген йыл март айны ахырында Дагъыстан республиканы гьукуматыны къарары булан «150 школа» деген программа яшавгъа чыгъарылмагъа гёз алгъа тутулгъан эди. Шо проектге гёре ремонт ишлер оьтгермек учун регионал бюджетлеге 202 миллион манат акъча маялар гёрсетилди.
2019-нчу йылда шо федерал программада бизин районну 9 школасы ортакъчылыгъын болдурду. Янгы 2020-нчы йылда шо программада къалгъан 14 школа ортакъчылыкъ этежек. Шо программаларда ортакъчылыкъ этген школалар алгъан акъча ремонт ва башгъа тюрлю ишлеге къолланажакъ.
Гетген йыл ортакъчылыкъ этген школалар бу йыл ортакъчылыкъ этмежек. Шо программагъа гёре школаларда 100-ге ювукъ охувчу яшлар бар буса 5 миллион манат, 400-ге ювукъ охувчу бар буса 10 миллион, 400-ден артыкъ охувчу яш бар буса 20 миллион манат акъча маялар гёрсетилежек.
Районну кёбюсю школалары 20 миллион манат акъча маялар булан пайдаланажакъ. Оьзюню сёзюн тамамлай туруп, Агьмат Гьажиев школаланы ёлбашчыларына документлени артгъа тартмай онгартып бермекни гьакъында дагъы да айтды.
Чараны ортакъчыларына районну башчысы Магьмут Амиралиев районну юртларында тазалыкъны юрютмеге тарыкъны гьакъында ташдырды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
