Элим мени – Дагъыстан!
Гьар йыл январ айны 20-нда бизин уьлкебиз Дагъыстан Автоном Совет Социалист республика къурулгъанлыгъына багъышлангъан байрам тархны белгилей.
Белгили кюйде, 1921-нчи йылны январ айыны 20-нда ВЦИК къабул этген Декрет булан ДАССР къурулгъан. 1991-нчи йыл Дагъыстан АССР Дагъыстан Совет Социалист Республикагъа айландырылгъан, сонг буса Дагъыстан Республика болгъан.
Тав элибизни аты алышынса да, Дагъыстанны халкълары янгы тарих гьалларда да, СССР бузулгъан сонг да, янгы харлысыз пачалыкълар къурулагъанда да оьзлер 1920-1921-нчы йылларда танглагъан ёлун сакълагъан, огъар амин болгъан, Россия булан бирче Россия Федерацияны составында къалгъан.
1994-нчю йылда къабул этилген янгы Конституциягъа гёре Дагъыстан республика РФ-ни составына оьз ихтиярлы, демек, суверенитетли, демократия пачалыкъ гьисапда гирген.
Оьтген йылланы узагъында республикабызны халкъы кёп янгылыкъланы къабул этген, кёп тюрлю затлагъа уьйренген. Халкъланы арасындагъы бирлик беклешген, миллетлер бирден-бир бек къатнашгъан.
Алдагъы гюн, демек, январ айны 20-нда, Къарабудагъгент Баш Китапханада китапхананы къуллукъчуларыны сиптечилиги булан «Элим мени – Дагъыстан» деген баш булан ДАССР къурулгъанлы 99 йыл битгенликге багъышлангъан шатлы чара оьтгерилди. Шатлыкъда муаллимлер, юрт школаланы 4,8-9-нчу класларыны охувчулары ортакъчылыкъ этди.
Инг башлап залдагъылар ДАССР къурулгъанлы 99 йыл битгенине багъышлангъан выставкагъа къарап чыкъдылар.
Шатлыкъны юрютювчюлери Азинат Пашаева ва Динаханым Ильясова ону ортакъчыларын байрам булан къутлагъан сонг, байрам гюнню тарихи гьакъда хабарладылар.
Сёз берилген Къарабудагъгент гимназияны 4-нчю класларыны охувчулары Дагъыстан элибизге, ватангъа, юртубузгъа багъышлангъан шиъруланы тынглагъанланы къурчун къандырып охуду.
Сонг сёз берилген районну юртларындагъы халкъланы китапхана къуллукъларын кютеген Центрны ёлбашчысы Аминат Сотаева да залдагъыланы ДАССР къурулгъанлы 99 йыл болагъаны булан къутлады ва кёп яхшылыкълар, парахат яшав, уьстюнлюклер ёрады.
- Дагъыстан – кёп тюрлю миллетлер яшайгъан тав элибиз. Дагъыстанны оьтесиз бырынгъы культурасы бар. Тав элини гьакъында кёп дагъыстанлы шаирлер, язывчулар ва художниклер язгъан, йырлагъан ва суратлагъан. Регион оьзюню кёп тюрлю халкълары булан белгили. Республикабыздан кёп белгили жамият чалышывчулар, алимлер, спортсменлер чыкъгъан. Биз олар булан оьктем болма ихтиярлыбыз, — деди ол. Шатлы байрам Къарабудагъгентдеги эргишилени А.Къаплановну атындагъы халкъ хоруну директору Асгендер Исрапиловну йырлаву булан тамамланды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
