Дагъыстан: йыллар ва агьвалатлар
Январ айны 20-нда Дёргели юрт китапханада «Дагъыстан: йыллар ва агьвалатлар» деген баш булан ДАССР къурулгъанлы 99 йыл болагъанлыгъына багъышлангъан шатлы чара оьтгерилди.
Шо шатлыкъда муаллимлер, охувчулар, музейни ва юрт администрацияны къуллукъчулары ортакъчылыкъ этди.
Чараны ачгъан ва юрютген китапхананы ёлбашчысы А.Изиева жыйылгъанланы байрам булан къутлады ва кёп яхшылыкълар ёрады. Оьзюню сёйлевюнде ол байрамны тарихи гьакъда айтды. Сёз берилген юрт администрацияны къуллукъчусу Зайира Салигьова Дагъыстанны халкълары гьакъда хабарлады, ерли шаир къыз Разият Шихшайитова Дагъыстангъа, ватангъа багъышлангъан шиъруларын охуду. Дёргели 1 номерли орта школаны муаллими Руманият Салаватова охувчуланы ата-бабаларыбыздан къалгъан алатлар – музей экспонатлар булан охувчуланы ювукъдан таныш этди.
Дёргели 1 номерли орта школаны 6-нчы класыны охувчулары жыйылгъанлагъа «Дагъыстан» деген адабият монтажын гёрсетди.
Чараны юрютювчю А.Изиева Дёргели юртну игит ва белгили уланлары гьакъда хабарлады, элини аминлиги учун жан бергенлерин, оланы къоччакълыкъларын эсгерди. Инкъылапчылар: Шамсутдин Абатов, Къадирагъа Къадирагъаев, Бадрутдин Камалов, Гьасан Болатов ва оьзгелерин эсгерип, олагъа багъышлап бир минутлукъ шыплыкъ билдирди.
Сонг ол жыйылгъанланы Дагъыстан АССР къурулгъанлы 99 йыл болагъанына багъышлангъан газет, китап ва сурат выставка булан таныш этди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
