Газет – районну гюзгюсю

Район газетде бек пагьмулу, къаламы итти ёлдашлар ишлеп, ёлбашчылыкъ этип гетген.

Газетни биринчи редактору Хизри Гьажиев болгъан.

1953-нчю йылда район газетге Магьаммат Салигьов ёлбашчылыкъ этме башлагъан.

Район газетни тарихи, материал-техника базасы, газетге ерли кадрлар танглав ва оьсдюрюв Магьаммат Салигьовну загьмат чалышыву булан тыгъыс байлавлу. Ол бажарыв­лу, пагьмулу журналистден къайры, бажарывлу иш къурувчу, ёлбашчы, педагог, насигьат беривчю, газетде ишлейген яш касбучуланы герти ёл гёрсетивчюсю, сабур, къатты чыдамлыгъы, тюзлюкню сюеген, ишни талап этеген ёлбашчы эди.

Район газетни редакциясыны буссагьатгъы бинасын кюрчюсюнден башлап Магьаммат Салигьов ишлетген. Алда газет еринде, ­оьзюню типографиясында жумада 3 керен чыгъып, охувчуланы къолуна тюше эди. М.Салигьов район газетге тайышывсуз 25 йыл ёлбашчылыкъ этди. Ондан сонг да хыйлы йыллар мухбир болуп ишледи.

Газетге оьтген девюрню ичинде хыйлы ёлдашлар: Абдулвагьап Межитов, Мурат Къурбанов, Шаравгьажи Гьажиев, Сагьадулла Юсупов, Магьамматмурат Канзитдинов ёлдашлар ёлбашчылыкъ этген. Гетген 2019-нчу йылны апрель айындан тутуп газетге Асадулла Гьажиев ёлбашчылыкъ эте.

Бизин газетде гьар тюрлю йыллар республикада аты белгили журналистлер ишлеп, оьрге гётерилгенлер. Олар – язывчулар, шаирлер Абдуллабек Абдуллабеков, Солтанбек Солтанбеков. Шарапутдин Сулейманов – ГТРК «Дагестан», Бадрутдин Магьамматов – шаир, Абдулвагьап Межитов – язывчу, Къурбанали Шамсутдинов – шаир ва оьзгелери.

Район газетни редакциясы оьзюню тарихинде районну жамият-сиясат, экономика яшавунда актив кюйде ортакъчылыкъ эте. Газетни къуллукъчулары (журналистлер) районну ёлбашчылары оьтгереген кёбюсю чараларда ортакъчылыкъ эте, газетни бетлеринден таба охувчулагъа, районну халкъына етишдирме гьаракат этелер.

Район газетни бетлеринде район Жыйынны депутатларыны, районну башчысыны буйрукълары, къарарлары басмадан чыгъа.

Район газетни къуллукъчулары газетни бетлеринден таба районну ёлбашчылары юрютеген социал-экономика сиясатны, этилип турагъан ишлени газетни охувчуларына малим этивде къошуму аслам.

Газетни бетлеринде гьар тюрлю тармакъларда чалышагъан алдынлы, бажарывлу касбучуланы гьакъында кёп-кёп материаллар языла.

Районда юрт хозяйство производствону гётеривде, топуракъланы, сугъарыв сувланы асувлу къоллавда, алдынлы фермерлени, муаллимлени иш сынавун, спортсменлерибизни уьстюнлюклерин пропаганда этивде, ерлерде этилеген оьзге ишлени малим этивде газетни къуллукъчулары ягъада токътамагъан.

Газетни бетлеринде танкъыт этилеген материаллар да аз язылмай. Шолай материаллар бар кемчиликлени алдын алма, тийишли чара гёрме районну ёлбашчыларына болушлукъ эте.

Газетни бетлеринде гьар тюрлю тармакълагъа байлавлу рубрикаланы тюбюнде кёп материаллар басмадан чыгъа, масала «Юрт хозяйство», «Бизге язалар», «Билим берив», «Савлукъ сакълав», «Яшланы бокъчасы», «Спорт» ва башгъалары.

Газетни бетлеринде (билим берив, савлукъ сакълав, юрт хозяйство) тармакъларда иш гёреген милли проектлени яшавгъа чыгъарывуна, этилип турагъан ишлеге де кёп тергев бериле ва языла.

Газетде дин, экстремизм, терроризмге къаршы язылгъан макъалалар да аз тюгюл.

Газет маданият, оьсюп гелеген яш наслуну патриот ругьда тарбиялавгъа, айыкъ яшав сюрюв масъалалагъа да кёп агьамият бакъдырагъаны аян ва гёрюнюп тура.

Газетни къуллукъчулары оьзлени гьаракаты, ишге намуслу янашыву булан районну социал-экономика оьсю­вюне иш ерлеринде оьз къошумун этелер.

Газетде ишде бай сынаву, касбу бажарывлугъу булангъы ёлдашлар чалыша. Олар: Абдуллабек Самадов (суратчы)-52 йыл, Нюрсагьадат Изамутдинова (газетни жаваплы секретары)-13 йыл, Калимат Канзитдинова (бёлюкню ёлбашчысы)-18 йыл, операторлар: Айпатимат Юсупова, Муъминат Зайналова-29, Русайдат Канзитдинова (корректор) -10 йыл оьз ишини усталары.