Яшлар учун яхшылыкъ

Школада этилеген бары да ишлени сиптечиси, охувчуланы да, муаллимлени де гьайын этип турагъан, иш уьстде ёлугъагъан бары да масъалаланы чечеген, ёкъну болдурагъан ва табагъан иш ёлбашчысы Гьалимат Гьажиевнаны атына кёп макътавлу сёзлер айтып, огъар савлай коллективни атындан баракалла билдирди. Охувчулар ва муаллимлер учун бары да шартланы болдурагъаны саялы огъар гьакъ юрекден разилигин англатгъан сонг, ёлбашчысына сёз берди.

- Аявлу охувчулар, къонакълар! Бугюн бизин учун школабызда уллу байрам – яхшылыкъны ва рагьмулулукъну гюню. Бизин школаны коллективини, охувчуланы, оланы ата-аналарыны атындан бугюн шу чарада ортакъчылыкъ этеген къонакъ­лагъа ва етишип болмай къалгъанларына да школада этилген къурулуш ишлерде, демек, алдагъы йылларда къошулгъан класлар, бу йыл ишленген санузел саялы сизге баракалла билдиремен. Бизин яшлар учун этген спонсорлукъ кёмегигиз саялы сизге Ал­лагь рази болсун! Шо ишленген къурулушлар сизин ва бизин гючюбюз булан ишленген.

Бизин арабызда шолай рагьмулу юрекли, чомарт къоллу адамлар баргъа мен бек шатман. Аявлу охувчулар, мен сизин шулайлардан уьлгю алма, олагъа ошама чакъыраман! Уллу болгъанда сиз де рагьмулу къолугъузну яхшылыкъ учун узатар, халкъ учун пайдалы ва кёмекли болар деп инанаман. Инг башлап, сизин барыгъызны да муаллим коллективни атындан да этилген ишлеге мени булан бирче биринчилерден болуп белсенген Къарабу­дагъгент юртну башчысы Магьамматсолтан Гьасановгъа разилигибизни билдиремен,-деди Гьалимат Гьарумова.

Сонг ол спонсорлукъ кёмегин болдургъан, къол ялгъагъан яшёрюмлени парламентини ёлбашчысы Абакар Къаранаевге, олай да Тажутдин Абакаровгъа, Абдулгьаким Къыявовгъа, Агъалав Аскеровгъа, Али Абакаровгъа, Осман Давутовгъа, Изамитдин Дагьировгъа, Магьамматсадат Абдулкъапуровгъа, Адилбек Абдуллатиповгъа, Рустам Черивовгъа, Дагьир Кулавовгъа, Алимурат Дагьировгъа, Магьач Къагь­румановгъа, Маккашарип Гьарумовгъа, Руслан Магьамматовгъа, Расул Маазовгъа, Болат Гьажиевге, Магьамматсайит Гьажиевге гьакъ юрекден разилигин билдире туруп, олагъа Баракалла кагъызлар тапшурду.

Олай да, къурулуш ишлерде актив кюйде кёмеклешген школаны 9-10-11-нчи класланы охувчуларына, эргиши ва къатынгиши коллективлерине айрыча баракалла билдирегени гьакъда айтды.

Охувчулар школасына кё­­мегин болдургъанлагъа багъышлап разилик билдирив шиъруларын гёнгюнден охуду.

Сонг Къарабудагъгент ­ юрт­ну башчысы М.Гьаса­новгъа сёз берилди.

Ол оьзюню сёйлевюнде Къарабудагъгент 2 номерли орта школагъа артдагъы йылларда кёп сююп гелегенин, бу коллективни ва ёлбашчысыны гьаракатына бек рази экенин айта туруп, къурулуш ишлерде кёмеклешгенлеге барысына да оьз ягъындан разилигин билдирди. Олай да, ол школаны охувчулары да яхшы ишлер этмеге гьазир, рагьмулу адамлар болажагъына инанагъанын ва шогъар оьтгерилген ишлени барышында мюкюр болгъанын эсгерди.

Сёз берилген яшёрюмлени парламентини ёлбашчысы Абакар Къаранаев оьзю де шу школада охугъанын, школаны абзарында ойнагъанын эсге ала туруп, гележекде шу ерде янгы ва уллу школа ишленер деп умут этегенин айтды.

Чараны тамамлай туруп, ону юрютювчюсю бирдагъы керен школаны коллективине, спонсорлукъ ва къол кёмегин болдургъанлагъа разилигин билдирди.