Меню
16+

Сетевое издание "Району яшаву"  «Будни района»

22.04.2019 14:23 Понедельник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Къоркъув билмейген Умар

Автор: Нюрсагьадат Изамутдинова

Алдагъы гюнлерде Дёргели юрт китапханада Уллу Ватан давну ортакъчысы Умар Арсланбековгъа багъышлангъан «Къоркъув билмейген Умар» деген баш булан чара оьтгерилди. Чарада Дёргели 1 ва 2 номерли школаланы муаллимлери ва охувчулары ортакъчылыгъын болдурдулар.

Ёлугъувну ачып, гелгенлер булан саламлашгъан сонг, юрт китапхананы ёлбашчысы Айшат Изиева оьтгерилеген ёлугъув юртлусу, Уллу Ватан давну ортакъчысы, Умар Арсланбековну къоччакълыкъларына багъышлангъанны англатды.

- Игитлер тюрлю-тюрлю бола. Биз бугюн оьзюню гьакъында сёйлейген, бугюнлерде бизин арабызда ёкъ Умар Арсланбеков Уллу Ватан давдан эки де къолсуз ва бир гёзсюз къайтгъан.

Ол жагьил заманындан берли спорт якъдан чыныкъгъан, къатты хасиятлары булангъы улан болгъан. Школаны битип, У.Арсланбеков ватанны алдындагъы борчун кютмеге асгерге гете. Аз да гетмей, “акъ финлер” булан дав башлана. Биринчи дав башлангъан гюнден тутуп ол оьзюню къоччакълыгъын гёрсете. Ол къурдашы да булан байлавлукъ юрютеген бузулгъан линияланы теллерин онгарма бакъдырыла. Ишин кютме чыкъгъанда ону къурдашы яралана. Чакъны явунлусуна да къарамайлы, У.Арсланбеков терекге минип теллени онгара, сонг гелип къурдашын аркъасына да салып, ­оьзюню бёлюгюне (частына) алып геле. Уллу Ватан дав башлангъандокъ, Умар Арсланбеков гёнгюллю кюйде давгъа гете. Уьч ай уьйренивлерде болгъан сонг, сержант У.Арсланбеков полкда сапёрланы бёлюгюню командири этилинип белгилене. Ол биринчилей Туапсе деген шагьарда уллу давларда ортакъчылыкъ эте. Олагъа чапгъын этмек учун тавну тюбюн миналардан тазаламагъа тарыкъ бола. Майданны тазалап битген сонг, бизин асгерлер душмангъа багъып чапгъын эте. Шо давда Умарны бёлюгю душманны 15 танкын ёкъ эте.

1943-нчю йылда Украинаны топурагъында темир ёлну ягъындагъы къамушланы ичинде душманлар яшынгъаны билине.

Командование У.Арсланбековну бёлюгюне совет асгерлер душмангъа чапгъын этеген майданланы миналардан тазаламакъны тапшура. Гезик булан майданны миналардан тазалап турагъанда, бир мина атылып, Умарны бир якъгъа багъып ташлай. Эсден тайгъан Умар госпитальда айыгъа, эки де къолун ва бир гёзюн тас этгенин биле. Ону учун бу иш бек къыйын тие. Тек У.Арсланбеков яшдан берли ягьлы, гючлю улан болгъангъа гёре, ол къыйынлыкъгъа чул билдирмей. Сынавлу профессор, хирург къолларыны билекден тюп ягъы (кисти) гесилген ердеги сюеклер Умаргъа бармакълар йимик къуллукъ этердей операция эте. Давда гёрсетген къоччакъ­лыкъ­лары ва игитликлери саялы Уллу Ватан давну биринчи даражалы ордени ва бир нече медаллары булан савгъатлангъан Умар ата юртуна къайта. Умар йимик къоччакъ адамлар юртлуларыбызны оьктемлиги болуп токътай. Бугюнлерде оьзю бизин арабызда болмаса да, ол бизин эсибизден бир заманда да таймажакъ,-деп хабарлай ол.

Сёз берилген муаллимлер М.Насурова ва Р.Шихсайитова дав йылланы гьакъында хабарлады, Уллу Ватан давну дёргелили ортакъчыларын эсге алды.

Сонг Дёргели 1 номерли школаны 6-7-нчи класларыны охувчулары дав темагъа багъышлангъан шиъруланы гёнгюнден охуду, «Къайда аталар?», деген йырны йырлады.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

10