Сугъарыв сувну гьайы этиле

Бизин районда юрт хозяйство агьамияты булангъы топуракъланы авадан яны къургъакълыкълар. Сугъарыла деп гьисап этилеген топуракълагъа чачылгъан оьсюмлюклени сугъарма сув етишмейген йыллар да аз болмай. Муна, тарихге гетип барагъан йыл да шулай йылланы бири болду.

Районда сугъарыв сувну масъаласын ёрукълу чечмек муратда оьр гьакимиятны вакиллери булан ёлугъувлар бола, масъаланы ёрукълу чечмек учун ёллар ахтарыла.

Сугъарыв сувну масъаласы айрокъда тавтюп зонада ерлешген муниципал къурулувларда итти токътагъан. Дёргели, Паравул, Гьели муниципал къурулувларда чачывланы сугъарма сув етишмей.

Дёргели зонадагъы топуракъланы сугъарыв сув булан таъмин этивню уьстюнде ишлей туруп, ноябр айны ахыр гюнлеринде хас комиссияны уьюрлери: районну башчысыны биринчи орунбасары М.Нухов, ДР-ни ФГБУ «МВХ-ну бизин райондагъы филиалыны ёлбашчысы К.Гьамзатов, Дёргели юрт муниципал къурулувну башчысы Гь.Мурзаев, РД-ни “Дагводсервис” ГКУ-ну ёлбашчысыны орунбасары А.Касимов, РД «Дагводсервис» ГКУ-ну ведущий инженери Ф.Алигьайдаров, КС ва УЖКХ-ны ёлбашчысыны орунбасары М.Абусайитов, районну юрт хозяйство управлениесини сувлагъа къарайгъан касбучусу З.Арсланбеков, Дёргели юрт муниципал къурулувну башчысыны орунбасары М.Талутов ёлдашлар сув кёл (водохранилище) къурма гёз алгъа тутулгъан участканы тергеп чыкъгъанлар.

Баянлыкъ беребиз: Бу кёлню Дёргели юртдан 3 чакъырымлар оьрде «Къакъа баш» деген ерде къурма гёз алгъа тутулгъан. Бу ерден “Дургала-тупок” деген оьзен агъа. Касбучулар токъташдырагъан кюйде, мунда секундда 25-30 литр сув агъа.

Комиссия токъташдыргъан кюйде кёп къадарда сув жыймагъа болагъан уллу кёл къурма имканлыкъ бар.

Кёл къурулса, Дёргели, Гьели, Аданакъ, Паравул юрт муниципал къурулувланы бир нече минг гектар юрт хозяйство агьамияты булангъы топуракъларын сугъарма имкан­лыкъ яратажакъ.

Бизге билдиреген кюйде, 2020-нчы йылда проект-ахтарыв ишлер башланма гёз алгъа тутулгъан.

Проект яшавгъа чыкъса, районну сабанчылары учун уллу савгъат болажакъ эди.