Адамлагъа онгайлыкълар болдурула
Гетген жума районну башчысыны кабинетинде районда ёл юрюшде хатабалагьланы алдын алмакъ муратда генгеш оьтгерилди. Шо генгешни барышында районну башчысы Магьмут Амиралиев районну ичиндеги бары да къурумлардан ёл юрюшде низамны болдурмакъ ва хатабалагьланы алдын алмакъ учун чалышмакъны талап этген эди.
Шоллукъда, “Кавказ” деген федерал сылама ёлну (ФАД) Янгы Агъачавулгъа ва Янгы Хушетге бурулагъан еринде яяв аякъдан юрюйген ёлавчулар (пешеходы) учун эсгерилген сылама ёлдан эсен-аман ари-бери чыкъмакъ учун кёпюрню ачылывуна багъышлангъан чара оьтгерилди.
Шо чарада ДР-ни Гьукуматыны ёлбашчысыны 1-нчи орунбасары Рамазан Алиев, Магьачкъала шагьарны башчысы Муса Мусаев, Къарабудагъгент районну башчысы Магьмут Амиралиев, “Росавтодор-Дагавтодор” идараны ёлбашчылары, Янгы Агъачавул ва Янгы Хушет юртлулар оьзлени ортакъчылыгъын болдурдулар. Чараны къурумчулукъ мюгьлетлерин Паравул 3 номерли орта школаны муаллимлери ва охувчулары онгаргъан эди.
Чараны барышында чыгъып къутлав сёзлер булан сёйлеген ДР-ни Гьукуматыны ёлбашчысыны 1-нчи орунбасары Рамазан Алиев, Магьачкъала шагьарны башчысы Муса Мусаев, Къарабудагъгент районну башчысы Магьмут Амиралиев, “Росавтодор-Дагавтодор” идараны ёлбашчылары ФАД “Кавказ” ёлну боюнда ерлешген ва яшайгъан агъачавуллулар ва хушетлилер учун гьалиги заман талап этеген ёлну уьстюнден кёпюр къурулгъанлыгъын сююнч гьислер булан айтдылар.
Шо гюн “Кавказ” ФАД-ны 819-нчу чакъырымында ачылгъан хас кёпюрню узунлугъу 35 метр бар. Гьар ёлавчу 40 канзиден оьрге гётерилмеге, 35 метр ёлну юрюмеге ва янгыдан 40 канзиден эниш тюшмеге герек. Кёпюр ёлдан 6 метрге бийикликде ерлешген. Демек, сылама ёлну бир янындан башгъа янына чыгъагъан адам, айрокъда яшлар, ёлдан ари-бери оьтеген машинлерден аман кюйде чыкъмагъа бола.
Адамлар юрюйген кёпюрню ачылывунда Янгы Агъачавул юртлуланы атындан Маликат Хидриева баракалласын ва разилигин билдирип сёйледи.
Шатлыкъда сёйлеген Къарабудагъгент районну башчысы Магьмут Гьюсейнович ДР-ни ва “Дагавтодор” идараны ёлбашчыларына аз болжалны ичинде булай арив, мукъаятлы, заман талап этеген кюйде ёлну уьстюнден кёпюр къургъанына гьакъ юрекден баракалласын билдирди.
Чараны тамамлай туруп, къызыл лентни гесмеге ихтияр ДР-ни Гьукуматыны ёлбашчысыны 1-нчи орунбасары Рамазан Алиевге, Къарабудагъгент районну башчысы Магьмут Амиралиевге ва Магьачкъаланы башчысы Муса Мусаевге берилди. Олар къызыл лентни гесген сонг, шатлыкъны ортакъчылары барысы да янгы къурулгъан кёпюрню бир янындан бириси янына яяв аякъдан юрюп чыкъдылар.
Адамлар учун булай онгайлыкълар этилсе, ёлда хатабалагьлар аз болажагъы мекенли. Айрокъда, яшлар учун булай кёпюрлер герек.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
